اردو ورلڈ کینیڈا ( ویب نیوز )وزیر اعظم شہباز شریف کی ہدایت پر سبسڈی والے گھی کی قیمت میں 2 روپے 50 پیسے کمی کر دی گئی۔
یوٹیلیٹی سٹورز کے ترجمان کے مطابق یوٹیلیٹی سٹورز کارپوریشن آف پاکستان نے وزیراعظم ریلیف پیکیج کے تحت فراہم کیے جانے والے رعایتی گھی کی قیمتوں میں کمی کر دی ہے جس کا باضابطہ نوٹیفکیشن بھی جاری کر دیا گیا ہے۔
نوٹیفکیشن کے مطابق ملک بھر کے تمام اسٹورز پر سبسڈی والے گھی کی قیمت میں 80 روپے فی کلو کمی کی گئی ہے۔ سبسڈی والا گھی جو پہلے 490 روپے فی کلو میں فروخت ہو رہا تھا، 7 جون سے 410 روپے فی کلو میں دستیاب ہوگا۔
بے نظیر انکم سپورٹ پروگرام کے تحت رجسٹرڈ صارفین کو گھی 300 روپے فی کلو فراہم کیا جائے گا۔
واضح رہے کہ یوٹیلٹی اسٹورز کارپوریشن وزیراعظم ریلیف پیکیج کے تحت بنیادی اشیاء (آٹا، چینی، گھی، چاول، دال) پر خصوصی سبسڈی فراہم کر رہی ہے۔ اس کے علاوہ یوٹیلیٹی سٹورز پر دستیاب دیگر برانڈڈ اشیاء کی قیمتیں بھی عام مارکیٹ سے بہت کم ہیں۔
یوٹیلیٹی سٹورز کارپوریشن عوام کو بروقت سستی اور معیاری اشیاء فراہم کرنے کی کوشش کرتی ہے۔
