اردوورلڈکینیڈا( ویب نیوز)وزیراعظم شہباز شریف نے آزاد کشمیر کی حالیہ صورتحال پر گہری تشویش کا اظہار کرتے ہوئے فوری نوٹس لیا اور شہریوں سے پرامن رہنے کی اپیل کی۔
انہوں نے کہا کہ احتجاج کرنا ہر شہری کا آئینی اور جمہوری حق ہے، لیکن اس دوران امن و امان کو نقصان پہنچانے سے گریز کیا جائے۔ وزیراعظم نے قانون نافذ کرنے والے اداروں کو ہدایت دی کہ وہ تحمل اور بردباری کا مظاہرہ کریں اور عوامی جذبات کا احترام یقینی بنائیں، ساتھ ہی غیر ضروری سختی سے اجتناب برتنے کی بھی تاکید کی۔
وزیراعظم نے مظاہروں میں پیش آنے والے ناخوشگوار واقعات پر افسوس کا اظہار کیا اور اس کی شفاف تحقیقات کا حکم دیا۔ انہوں نے متاثرہ خاندانوں کو فوری امداد پہنچانے کی ہدایت بھی کی۔
مسئلے کے پرامن حل کے لیے حکومت نے مذاکراتی کمیٹی میں توسیع کا فیصلہ کیا ہے، جس میں سینیٹر رانا ثنا اللہ، وفاقی وزراء سردار یوسف اور احسن اقبال، سابق صدر آزاد کشمیر مسعود خان اور قمر زمان کائرہ کو شامل کیا گیا ہے۔ وزیراعظم نے ہدایت دی کہ یہ کمیٹی فوری طور پر مظفرآباد جائے اور مسائل کا دیرپا حل تجویز کرے۔
انہوں نے ایکشن کمیٹی کے رہنماؤں سے اپیل کی کہ وہ مذاکراتی عمل میں تعاون کریں تاکہ سفارشات بلا تاخیر وزیراعظم آفس کو بھیجی جا سکیں اور عملی اقدامات کیے جا سکیں۔ وزیراعظم نے اعلان کیا کہ وطن واپسی پر وہ خود مذاکراتی عمل کی نگرانی کریں گے۔
