آئی ایس پی آر کے مطابق آرمی چیف جنرل سید عاصم منیر کی زیر صدارت جی ایچ کیو میں 260ویں کور کمانڈرز کانفرنس ہوئی۔
پاک فوج کے شعبہ تعلقات عامہ کے مطابق آرمی چیف جنرل سید عاصم منیر نے تمام غیر قانونی تارکین وطن کی باعزت اور محفوظ وطن واپسی اور ڈیپوٹیشن کو یقینی بنانے کی ہدایت کی۔
آرمی چیف نے آپریشنز کے دوران پیشہ ورانہ مہارت کے معیار کو برقرار رکھنے اور فارمیشنز کی تربیت کے دوران بہترین کارکردگی کے حصول پر زور دیا۔
فورم کو خطے کی صورتحال اور قومی سلامتی کو درپیش چیلنجز اور بڑھتے ہوئے خطرات پر بریفنگ دی گئی۔
آرمی چیف نے کہا کہ ملک کو اس طرح کی معاشی سرگرمیوں کے منفی اثرات سے نجات دلانے کے لیے آنے والے دنوں میں مختلف علاقوں میں ذخیرہ اندوزی، سمگلنگ مافیاز اور کارٹیلز کے خلاف کارروائیاں تیز کی جائیں گی۔
آرمی چیف نے کہا کہ فوج ملک بھر میں غیر قانونی سرگرمیوں کے خلاف سخت قانونی کارروائی کرنے میں حکومت اور اداروں کو ہر ممکن تعاون فراہم کرتی رہے گی۔
فورم میں غیر قانونی معاشی سرگرمیوں کے خلاف جاری آپریشنز کا بھی جائزہ لیا گیا، فورم نے غزہ اسرائیل جنگ میں اسرائیل کی جانب سے طاقت کے استعمال میں معصوم شہریوں کی جانوں کے ضیاع پر تشویش کا اظہار کیا۔
کورکمانڈرز کانفرنس نے یکم نومبر تک غیر قانونی تارکین وطن کو ملک بدر کرنے اور وطن واپس بھیجنے کے حکومتی فیصلے کی مکمل حمایت کرنے کا عہد کیا۔
کانفرنس کے شرکاء نے معیشت کی بحالی کے لیے جاری اقدامات کو عوام کی فلاح و بہبود کے لیے ہر ممکن تعاون فراہم کرنے کے عزم کا اظہار کیا۔
کور کمانڈرز کانفرنس کے شرکاء نے اس عزم کا اظہار کیا کہ ریاست دشمن قوتوں، دہشت گردوں اور پاکستان کو غیر مستحکم کرنے والے سہولت کاروں کے خلاف پوری قوت سے نمٹے گی۔
