اردو ورلڈکینیڈا ( ویب نیوز)موٹروے پولیس نے عوام سے گھروں میں رہنے اور غیر ضروری سفر سے گریز کرنے کی درخواست کی ہے۔
لاہور سمیت پنجاب کے مختلف شہروں میں بدھ اور جمعرات کی درمیانی رات کو شدید دھند نے ٹریفک کی روانی کو بری طرح متاثر کیا۔
تفصیلات کے مطابق صوبہ بھر کے میدانی علاقوں کی مرکزی سڑکوں پر شدید دھند کے باعث حد نگاہ کم ہوگئی ہے جس کے باعث ملتان سے ڈاہر پیر تک موٹروے ایم 5 اور مریدکے سے سمبڑیال تک لاہور سیالکوٹ موٹروے ایم 11 کو ہر قسم کی ٹریفک کے لیے بند کردیا گیا ہے۔
موٹروے پولیس نے ڈرائیوروں سے اپیل کی ہے کہ وہ سفر کے لیے جی ٹی روڈ کا استعمال کریں۔
انہوں نے ڈرائیوروں پر بھی زور دیا ہے کہ وہ آہستہ گاڑی چلائیں اور فوگ لائٹس آن کریں۔
موٹروے پولیس نے لوگوں سے گھروں میں رہنے اور غیر ضروری سفر سے گریز کرنے کی بھی درخواست کی ہے۔ قومی شاہراہ پر صوبے میں کئی مقامات پر شدید دھند کے باعث حد نگاہ کم ہونے کی وجہ سے ٹریفک میں خلل پڑا ہے۔
