اردو ورلڈ کینیڈا ( ویب نیوز )مون سون کے حالیہ غیر معمولی بارشوں کے دوران پاک فضائیہ نے جنوبی پنجاب، بلوچستان اور سندھ کے سیلاب سے متاثرہ علاقوں میں پھنسے ہوئے لوگوں کو انسانی بنیادوں پر امداد اور قدرتی آفات سے متعلق امداد فراہم کرنے کا سلسلہ جاری رکھا۔
پی اے ایف کی ایک نیوز ریلیز میں بتایا گیا کہ امدادی سرگرمیاں نورواہ، مدد پور، کوٹ مگسی، ماڑی پور، صحبت پور، حبیب کوٹ، فتح پور، صادق پل، فاضل پور اور حاجی پور کے علاقوں میں جاری ہیں۔
پاک فضائیہ کے سربراہ ائیر چیف مارشل ظہیر احمد بابر سدھو کی خصوصی ہدایات پر پاک فضائیہ کی ایمرجنسی ریسپانس ٹیمیں گھروں میں پھنسے لوگوں کو راشن فراہم کرنے کے لیے دن رات کوشاں ہیں۔
، پی اے ایف کے قائم کردہ فیلڈ میڈیکل کیمپوں میں سیلاب متاثرین کو علاج اور ادویات کی فراہمی کے لیے تمام دستیاب وسائل بروئے کار لائے جا رہے ہیں۔
پی اے ایف قدرتی آفات کے دوران انسانی امداد پہنچانے میں ہمیشہ پیش پیش رہا ہے۔
جنوبی پنجاب، بلوچستان اور سندھ کے علاقوں میں ریلیف آپریشن پی اے ایف کے اس عزم کا عملی مظہر ہے کہ مشکل کی گھڑی میں ہم وطنوں کی ہر ممکن مدد کی جائے گی۔
