اردو ورلڈ کینیڈا ( ویب نیوز ) پاکستان کرکٹ بورڈ (پی سی بی) نے سری لنکا کے خلاف ون ڈے سیریز کے شیڈول میں تبدیلی کے بعد تین ملکی ٹورنامنٹ (Tri-Nation Series) کا شیڈول بھی ازسرِ نو جاری کر دیا ہے۔
پی سی بی کے مطابق اب تین ملکی ٹورنامنٹ کے تمام میچز راولپنڈی میں 18 سے 29 نومبر تک کھیلے جائیں گے۔ اس ٹورنامنٹ میں پاکستان، سری لنکا اور زمبابوے کی ٹیمیں حصہ لیں گی۔
اس سے قبل ٹورنامنٹ کے میچز راولپنڈی اور لاہور میں 17 سے 29 نومبر تک شیڈول تھے، تاہم انتظامی وجوہات کے باعث اس میں تبدیلی کی گئی ہے۔پاکستان کرکٹ بورڈ نے اپنے بیان میں کہا کہ ’’یہ فیصلہ آپریشنل بنیادوں پر کیا گیا ہے اور اس سلسلے میں تمام شریک بورڈز سے مشاورت کی گئی ہے۔‘‘
واضح رہے کہ اس سے قبل پی سی بی نے سری لنکا کے خلاف ون ڈے سیریز کے باقی دو میچوں کے شیڈول میں بھی تبدیلی کی تھی۔چیئرمین پی سی بی محسن نقوی نے سوشل میڈیا پر جاری بیان میں بتایا کہ پاکستان اور سری لنکا کے درمیان باقی دو ون ڈے میچز اب 14 اور 16 نومبر کو کھیلے جائیں گے۔پہلے یہ میچز 13 اور 15 نومبر کو شیڈول تھے، مگر انتظامی ضروریات کے پیشِ نظر نئی تاریخوں کا اعلان کیا گیا۔کرکٹ ماہرین کے مطابق، تین ملکی سیریز کا تمام تر انعقاد راولپنڈی میں کرنے کا فیصلہ سیکیورٹی، لاجسٹک اور موسم کی صورتحال کو مدنظر رکھتے ہوئے کیا گیا ہے۔
