اردوورلڈ کینیڈا ( ویب نیوز )آرمی چیف جنرل سید عاصم منیر نے کہا ہے کہ سیکیورٹی فورسز دہشت گردی کی کارروائیوں کا بھرپور اور موثر جواب دیں گی۔

انٹر سروسز پبلک ریلیشنز کے مطابق آرمی چیف جنرل سید عاصم منیر نے کوئٹہ گیریژن کا دورہ کیا، آرمی چیف کا کوئٹہ گیریژن پہنچنے پر کور کمانڈر کوئٹہ نے استقبال کیا، آرمی چیف کو ژوب واقعے پر بریفنگ دی گئی۔

پاک فوج کے شعبہ تعلقات عامہ کے مطابق آرمی چیف نے سانحہ ژوب کے شہداء کو خراج عقیدت پیش کیا۔

آرمی چیف نے کہا کہ پاکستان کی مسلح افواج کو افغانستان میں دہشت گردوں کی محفوظ پناہ گاہوں پر شدید تحفظات ہیں، کالعدم تحریک طالبان کو افغانستان میں کھلی آزادی ہے، پاکستان میں دہشت گردی کی کارروائیوں میں افغان شہریوں کے ملوث ہونے پر تشویش ہے۔ .

جنرل سید عاصم منیر نے کہا کہ افغان عبوری حکومت سے توقع ہے کہ وہ افغانستان کی سرزمین کو کسی دوسرے ملک کے خلاف دہشت گردی کے لیے استعمال نہیں ہونے دیں گے

آرمی چیف کا کہنا تھا کہ دہشت گردوں کے خلاف بلاامتیاز آپریشن جاری رہے گا، ملک سے دہشت گردی کی لعنت کے خاتمے تک مسلح افواج آرام سے نہیں بیٹھیں گی۔