اردو ورلڈ کینیڈا ( ویب نیوز )خصوصی کمیٹی نے سابق چیف جسٹس ثاقب نثار کے بیٹے نجم ثاقب کی مبینہ آڈیو لیک کی تحقیقات کے لیے وزارت داخلہ کو خط لکھنے کا فیصلہ کیا ہے۔
سابق چیف جسٹس ثاقب نثار کے صاحبزادے نجم ثاقب کی مبینہ آڈیو لیک پر اسپیکر قومی اسمبلی کی جانب سے قائم کردہ خصوصی کمیٹی کا اجلاس رکن اسمبلی اسلم بھوتانی کی زیر صدارت ہوا۔
اجلاس میں چیئرمین کمیٹی اسلم بھوتانی نے کہا کہ کمیٹی ایوان کی کارروائی سپریم کورٹ کے حوالے کرنے سے متعلق فیصلوں سے ایوان کو آگاہ کرے گی اور سابق چیف جسٹس ثاقب نثار کے صاحبزادے نجم نثار کی آڈیو لیک ہونے کے معاملے کی تحقیقات کرے گی۔ کمیٹی نے ایف آئی اے سے 10 روز میں رپورٹ طلب کر لی۔
خصوصی کمیٹی نے نجم ثاقب کو بھی کمیٹی میں مدعو کرنے کا فیصلہ کیا ہے۔ اس حوالے سے اسلم بھوتانی کا کہنا تھا کہ نجم ثاقب اور ٹکٹ ہولڈر کمیٹی میں آ کر معاملے پر اپنی رائے دے سکتے ہیں۔ اس کے بعد ارکان تقسیم ہوگئے جس کے بعد جمعہ کو نجم ثاقب اور ٹکٹ ہولڈر کو طلب کرنے کے معاملے پر خصوصی کمیٹی کا ان کیمرہ اجلاس طلب کرلیا گیا۔
کمیٹی کے چیئرمین کا مزید کہنا تھا کہ ہم کسی ادارے یا شخص کے خلاف نہیں، خرید و فروخت کے خلاف ہیں، تحقیقات انصاف کے تقاضے پورے کریں گی، اس کے علاوہ کمیٹی نے رجسٹرار سپریم کورٹ کو وزارت میں طلب کرنے کا معاملہ بھی موخر کردیا۔ . ۔
