اردو ورلڈ کینیڈا ( ویب نیوز )قائمہ کمیٹی نے عدالتی اصلاحات سے متعلق سپریم کورٹ پریکٹس اینڈ پروسیجر بل 2023 کی منظوری دے دی۔

قائمہ کمیٹی برائے قانون و انصاف نے اضافی ترامیم کے ساتھ بل کی متفقہ طور پر منظوری دے دی، قائمہ کمیٹی سے منظوری کے بعد اسے آج قومی اسمبلی میں پیش کیا جائے گا۔

سپریم کورٹ کےاختیارات محدود کرنے کا بل قومی اسمبلی میں پیش

بل میں تجویز کیا گیا تھا کہ سپریم کورٹ کے تین سینئر ترین ججوں پر مشتمل ایک کمیٹی ازخود نوٹس پر فیصلہ کرے گی، جب کہ از خود فیصلے کے 30 دن کے اندر اپیل دائر کرنے کا حق ہوگا۔

اپیل دائر کرنے کے 14 دن کے اندر سماعت کے لیے مقرر کرنا ہوگا اور از خود نوٹس لینے کے بعد سماعت 3 رکنی بینچ کرے گا جب کہ اس حوالے سے اکثریت کا فیصلہ قابل قبول ہوگا۔

قانون کی منظوری کے بعد سپریم کورٹ یا ہائی کورٹ یا کسی دوسرے قانون کا کوئی فیصلہ اس پر اثر انداز نہیں ہو سکے گا۔

اضافی ترامیم کے تحت زیر التوا مقدمات میں اپیل کا حق بھی دستیاب ہوگا جب کہ اضافی ترمیم کے تحت آئینی اور قانونی معاملات پر تشکیل دیا جانے والا بنچ کم از کم پانچ ججوں پر مشتمل ہوگا۔