اردوورلڈ کینیڈا ( ویب نیوز)عوامی مسلم لیگ کے سربراہ اور سابق وزیر داخلہ شیخ رشید نے کہا ہے کہ نگران حکومت کے اختیارات مضبوط کرنے کے لیے کی گئی ترمیم انتخابات کے آغاز کو مشکوک بنا رہی ہے۔
سوشل میڈیا ویب سائٹ ٹوئٹر پر اپنے ایک بیان میں عوامی مسلم لیگ کے سربراہ اور سابق وزیر داخلہ شیخ رشید نے کہا کہ اسحاق ڈار کو نگرا ن وزیراعظم بنانا نواز شریف کا فیصلہ ہے تاکہ وہ اپنی من مانی اور دھاندلی جاری رکھ سکیں۔
نگران حکومت کے اختیارات کو طاقتور بنانے کے لیے ترمیم الیکشن کی شروعات کو ہی مشکوک بنارہی ہیں اسحاق ڈار کو نگران وزیراعظم بنانا نواز شریف کا فیصلہ ہے تاکہ اپنی من مانی اور دھاندھلی کو جاری رکھ سکیں نگران حکومت کا سیٹ اپ طویل بھی ہوسکتا ہے سیکشن 203 میں ترمیم آئین اور قانون اور صاف…
— Sheikh Rashid Ahmed (@ShkhRasheed) July 26, 2023
انہوں نے کہا کہ نگران حکومت کا سیٹ اپ طویل ہوسکتا ہے، دفعہ 203 میں ترمیم آئین و قانون کی موت ہوگی اتحادی ٹوٹنے جارہے ہیں۔
سابق وزیر داخلہ نے پیش گوئی کرتے ہوئے کہا کہ ایسا نگرا ن وزیراعظم آسکتا ہے جس کا سیاسی حلقوں میں ابھی چرچا نہیں، اگست کے مہینے میں عدلیہ بھی اہم فیصلے کرے گی جب کہ ستمبر کا مہینہ جابرانہ ہوگا اور سیاست بھی سنگین تنازعات میں الجھ سکتی ہے۔
شیخ رشید کا مزید کہنا تھا کہ پیپلز پارٹی اور نون لیگ ایک ہفتے میں آمنے سامنے ہوں گی، بہت سی امیدوں پر پانی پھر جائے گا، سندھ پیپلز پارٹی کے لیے اتنا آسان نہیں ہوگا۔
انہوں نے کہا کہ الیکشن سے قبل نیا سیاسی جوڑ توڑ سامنے آئے گا جس سے اتحادوں کا سیاسی نقشہ بدل جائے گا، جب اتحاد اپنے اپنے انتخابی نشان پر الیکشن لڑیں گے تو اتحادوں کے درمیان فاصلے بڑھیں گے اور ان کے ووٹ بھی تقسیم ہوں گے۔ .
شیخ رشید کا مزید کہنا تھا کہ نگرا ن وزیراعظم کا فیصلہ تمام سیاسی گرہیں کھول دے گا اور مستقبل کی سیاست کا بھی تعین کرے گا۔ وقت ثابت کرے گا کہ عوام کو جاہل سمجھنے والے بہت جاہل تھے۔
