اردو ورلڈ کینیڈا ( ویب نیوز )مسلم لیگ (ن) کے مرکزی رہنما اور وزیر دفاع خواجہ آصف نے کہا ہے کہ فوجی عدالتوں میں ٹرائل سے متعلق درخواست پر سپریم کورٹ کا بینچ ٹوٹ گیا، جس کے نتائج آج یا کل سامنے آئیں گے۔ .
قومی اسمبلی اجلاس سے خطاب کرتے ہوئے مسلم لیگ ن کے رہنما خواجہ آصف نے کہا کہ فوجی عدالتوں میں شہریوں کے ٹرائل کا معاملہ سپریم کورٹ میں لے جا چکے ہیں، گزشتہ دور حکومت میں فوجی عدالتوں سے 24 سے 25 افراد کو سزائیں سنائی گئیں۔

انہوں نے کہا کہ جن لوگوں نے یہ معاملہ اٹھایا ہے ان کے سیاسی مفادات ہیں، درخواست گزاروں کو اپنے اور اپنی جماعتوں سے تعلقات ہیں۔ ایسے جرائم ہماری تاریخ میں نہیں ملتے، ریاست ایسے جرائم کی متحمل نہیں ہو سکتی۔
خواجہ آصف کا کہنا تھا کہ سب نے دیکھا کہ شہداء کی نشانیوں کے ساتھ کیا سلوک کیا جاتا ہے، ایک شہید کی لاش ہمارے دشمن نے عزت کے ساتھ ہمارے حوالے کی، لیکن ان لوگوں نے اس شہید کے مجسمے کے ساتھ کیا کیا؟ سیاسی مقاصد کے لیے ملک کی عزت و وقار کو داؤ پر نہ لگائیں۔
وزیر دفاع نے کہا کہ آپ میراث چھوڑ کر جا ئیںتاکہ لوگ آپ کو اچھے الفاظ میں یاد رکھیں، جو لوگ ہمارے ملک کے لیے جانیں قربان کر رہے ہیں وہ ہمارے محسن ہیں، میں ایوان سے اپیل کرتا ہوں کہ میری عزت کی حفاظت کی جائے یہ ایوان پیغام دے کہ ہم اپنے وقار پر کوئی سمجھوتہ نہیں کریں گے۔