اردوورلڈ کینیڈا( ویب نیوز)سپریم کورٹ کے آئینی بنچ نے فوجی عدالتوں میں عام شہریوں کے مقدمات کی سماعت کے دوران زیر حراست ملزمان کو عام جیلوں میں منتقل کرنے کی درخواست مسترد کر دی۔

جسٹس امین الدین خان کی سربراہی میں سات رکنی آئینی بنچ نے فوجی عدالتوں میں شہریوں کے مقدمات چلانے کے خلاف کیس کی سماعت کی۔
سماعت کے دوران وکیل لطیف کھوسہ نے استدعا کی کہ زیر حراست ملزمان کو جنرل جیلوں میں منتقل کیا جائے، تاکہ جیلوں میں کم از کم ملاقاتیں ہو سکیں۔
عدالت نے زیر حراست ملزمان کو عام جیلوں میں منتقل کرنے کی استدعا مسترد کرتے ہوئے اپنے ریمارکس میں کہا کہ اٹارنی جنرل نے ملاقات کے حوالے سے یقین دہانی کرائی ہے، وہ کیس سن رہے ہیں، فی الحال کہیں اور نہ جائیں۔
سماعت کے دوران ایڈیشنل اٹارنی جنرل نے سماعت ملتوی کرنے کی استدعا کرتے ہوئے کہا کہ وزارت دفاع کے وکیل خواجہ حارث بیمار ہیں اور پیٹ میں درد کی وجہ سے پیش نہیں ہو سکتے۔
بعد ازاں عدالت نے ایڈیشنل اٹارنی جنرل کی استدعا منظور کرتے ہوئے کیس کی مزید سماعت جمعرات 12 دسمبر تک ملتوی کر دی۔