اردو ورلڈ کینیڈا ( ویب نیوز ) ٹیرف کی ادائیگی یکم اگست سے شروع ہو جائے گی ، ٹرمپ نے اس اقدام کو امریکی معیشت کو مستحکم کرنے کی جانب ایک اہم قدم قرار دیا ہے۔
بین الاقوامی امور پر بات کرتے ہوئے صدر ٹرمپ نے دعویٰ کیا کہ ان کے دور صدارت میں کئی جنگوں کو روکا گیا جس کے نتیجے میں لاکھوں انسانی جانیں بچ گئیں۔انہوں نے کہا کہ روسی یوکرین جنگ صدر بائیڈن کے دور میں شروع ہوئی تھی جبکہ روس نے ان کے دور میں کوئی جارحیت نہیں کی تھی۔صدر ٹرمپ نے مزید کہا کہ انہوں نے پاکستان اور بھارت کے درمیان ممکنہ جنگ کو بھی روکا اور دونوں ممالک کے درمیان کشیدگی کو کم کرنے میں کلیدی کردار ادا کیا۔انہوں نے سابق صدر جو بائیڈن کی کمزور پالیسیوں کو دنیا بھر میں جنگوں اور تنازعات کی بنیادی وجہ قرار دیا اور کہا کہ ان کی حکومت نے ان غلطیوں کو درست کیا ہے۔
انہوں نے کہا کہ عالمی امن کو یقینی بنانے کے لیے ایران کی جوہری تنصیبات کو مکمل طور پر تباہ کر دیا گیا ہے۔صدر ٹرمپ نے افریقہ میں امن کی تعمیر کے بارے میں بات کرتے ہوئے کہا کہ وہ روانڈا اور کانگو کے درمیان طویل عرصے سے جاری جنگ کا خاتمہ کر چکے ہیں۔روس کے بارے میں بات کرتے ہوئے انہوں نے کہا کہ صدر ولادیمیر پوٹن کے امن کے وعدوں پر عمل درآمد نہیں ہوا۔. تاہم ٹرمپ نے امید ظاہر کی کہ پوٹن 50 دنوں میں اپنا ارادہ بدل لیں گے۔.ایران کے ساتھ مذاکرات کے حوالے سے صدر ٹرمپ نے کہا کہ انہیں مذاکرات کی کوئی جلدی نہیں ہے اور تمام فیصلے امریکہ کے مفادات کو ذہن میں رکھتے ہوئے کیے جائیں گے۔اس کے علاوہ انہوں نے کہا کہ ویتنام کے ساتھ ایک اچھا تجارتی معاہدہ طے پا گیا ہے جس سے دونوں ممالک کو معاشی طور پر فائدہ پہنچے گا۔
