اردو ورلڈ کینیڈا ( ویب نیوز ) یو اے ای نے نے اصولی طور پر پاکستان کے 2 ارب ڈالر کے ڈپازٹ کی واپسی کی مدت میں مزید دو ماہ کی توسیع (رول اوور) پر اتفاق کر لیا ہے
جسے ملک کی معاشی صورتحال کے تناظر میں ایک اہم پیش رفت قرار دیا جا رہا ہے۔اعلیٰ سرکاری عہدیدار کے مطابق امارات نے اس رقم کو 17 اپریل 2026 تک رول اوور کرنے پر رضامندی ظاہر کی ہے۔ ذرائع کا کہنا ہے کہ یہ یقین دہانی اس وقت حاصل ہوئی جب نائب وزیر اعظم اور وزیر خارجہ Ishaq Dar نے رواں ہفتے اعلیٰ اماراتی حکام سے رابطہ کیا اور مالی تعاون جاری رکھنے کی درخواست کی۔
حکومتی ذرائع کے مطابق یہ مختصر مدتی توسیع 6.5 فیصد شرح سود پر دی گئی ہے اور متعلقہ حکام کی جانب سے باضابطہ منظوری جلد متوقع ہے۔ ماہرین کا کہنا ہے کہ یہ فیصلہ ایسے وقت سامنے آیا ہے جب پاکستان اور International Monetary Fund کے درمیان تیسرے جائزہ مذاکرات جاری ہیں، اس لیے اماراتی اقدام کو مذاکرات کے لیے مثبت اشارہ سمجھا جا رہا ہے۔
یہ پیش رفت اس لیے بھی اہم ہے کیونکہ ایک ماہ کی سابقہ توسیع ختم ہونے میں محض چند دن باقی تھے۔ ذرائع کے مطابق اسلام آباد نے اماراتی حکام کو آگاہ کر دیا ہے کہ آئی ایم ایف کے ساتھ مذاکرات مکمل ہونے کے بعد طویل مدتی رول اوور کے لیے دوبارہ رابطہ کیا جائے گا۔یاد رہے کہ جنوری میں بھی متحدہ عرب امارات نے ڈپازٹ کی میعاد ختم ہونے پر ایک ماہ کی توسیع دی تھی، جبکہ ایک ارب ڈالر کی تیسری قسط جولائی 2026 میں واجب الادا ہے۔
ترجمان دفتر خارجہ Tahir Hussain Andrabi نے بتایا کہ اسحاق ڈار خود اس معاملے کی نگرانی کر رہے ہیں اور اماراتی حکام کے ساتھ مسلسل مشاورت کے ذریعے مثبت پیش رفت ممکن بنائی گئی ہے۔ ان کے مطابق رول اوور کی مدت کا تعین قرض دینے والے ملک کا اختیار ہوتا ہے، تاہم نائب وزیر اعظم کی کاوشوں سے یہ توسیع یقینی بنائی گئی۔
ترجمان نے مزید کہا کہ وزیر خزانہ کے بیان کے مطابق پاکستان کے بیرونی مالیاتی پروفائل میں کسی قسم کا خلا نہیں اور آئی ایم ایف کے ساتھ معاملات درست سمت میں آگے بڑھ رہے ہیں۔ اقتصادی ماہرین کے مطابق یہ توسیع زرمبادلہ کے ذخائر کو سہارا دینے اور مالی دباؤ کم کرنے میں مددگار ثابت ہو سکتی ہے۔
