اردو ورلڈ کینیڈا ( ویب نیوز ) اسرائیل کےلبنان پر حملے جاری ، امریکی صدر جو بائیڈن نے کہا ہے کہ وہ ایران کی جوہری تنصیبات پر اسرائیل کے حملے کی حمایت نہیں کریں گے۔دو روز قبل ایران کی جانب سے اسرائیل پر بیلسٹک میزائل حملے کے بعد امریکہ نے اسرائیل کی حمایت جاری رکھنے کا اعلان کیا تھا۔انہوں نے کہا کہ ایران کے میزائل حملے کے بعد مشرق وسطیٰ میں کشیدگی خطرناک حد تک بڑھ گئی ہے جو پورے خطے کو اپنی لپیٹ میں لے سکتی ہے۔
امریکی صدر نے کہا کہ جی 7 ممالک نے اسرائیل پر میزائل حملے کے بعد ایران کے خلاف نئی اور سخت اقتصادی پابندیاں عائد کرنے پر اتفاق کیا ہے جس پر جلد عمل درآمد کیا جائے گا۔جو بائیڈن کے مطابق ایران کی جوہری تنصیبات پر اسرائیلی حملے خطے میں انتہائی خوفناک صورتحال پیدا کر سکتے ہیں۔امریکی صدر نے مزید کہا کہ کینیڈا، جرمنی، جاپان، برطانیہ، فرانس اور اٹلی سمیت G7 ممالک ایران کی جوہری تنصیبات پر حملے کے حق میں نہیں ہیں۔واضح رہے کہ دو روز قبل ایران نے اسرائیل پر براہ راست 200 بیلسٹک میزائل داغے تھے۔. پاسداران انقلاب نے کہا کہ یہ حملہ حماس کے رہنما اسماعیل ہنیہ اور حزب اللہ کے رہنما حسن نصر اللہ کی شہادت کا بدلہ لینے کے لیے کیا گیا ہے۔
