اردوورلڈ کینیڈا ( ویب نیوز) دریائے ستلج میں پانی کی سطح ایک بار پھر بلند ہونے لگی، کئی دیہات زیر آب ، ہیڈ گنڈا سنگھ والا میں پانی کی سطح ایک بار پھر 20 فٹ تک بڑھ گئی۔دریائے ستلج میں طغیانی کے باعث ہیڈ گنڈا سنگھ والا کے مقام پر پانی کا بہاؤ 65 ہزار کیوسک تک پہنچ گیا، دریا اوور فلو ہونے سے کئی دیہات زیر آب آگئے جس کے باعث الرٹ جاری کردیا گیا

ستلج اور راوی دونوں مقامات پر پانی کے باعث ضلعی انتظامیہ پھنس گئی ریسکیو اہلکار بھی مشکلات کا شکار ہوگئے۔
بہاولنگر ضلع میں ہیڈ سلیمانکی کے مقام پر نچلے درجے کے سیلاب کے باعث دریائے ستلج میں پانی کی سطح ایک بار پھر بلند ہونے لگی، ہیڈ سلیمانکی پر پانی کا اخراج 57196 کیوسک اور اخراج 46186 کیوسک تک پہنچ گیا۔
ضلع بہاولنگر میں نچلے درجے کے سیلاب سے تین تحصیلیں بری طرح متاثر ہوئیں، پانی کے تیز بہاؤ سے کئی حفاظتی بند ٹوٹ گئے، ہزاروں ایکڑ پر کھڑی قیمتی فصلیں بھی سیلابی پانی سے تباہ، درجنوں رہائشی کیمپوں اور آبادیوں کو شدید نقصان پہنچا۔
متاثرہ علاقوں میں ہزاروں افراد تاحال بے گھر ہیں، سیلابی پانی سے فصلیں اور مکانات زیرآب آنے سے لوگوں کو شدید مشکلات کا سامنا ہے۔
احمد پور شرقیہ میں بھی دریائے ستلج میں پانی کی سطح 6 فٹ بلند ہوگئی، پتن ایمن والا کے قریب وسیع فصلیں زیرآب آگئیں۔
ہیڈ پنجند سے گزرنے والے دریائے ستلج اور دریائے چناب کے پانی کی سطح بھی ہیڈ پنجند پر ریکارڈ کی گئی ہے۔