تفصیلات کے مطابق غزہ کے معصوم شہریوں پر اسرائیلی مظالم کا سلسلہ تاحال جاری ہے، خان یونس کے قریب صہیونی فوج کے فضائی حملے میں 30 بے گناہ فلسطینی شہید اور 100 سے زائد زخمی ہوگئے۔
اسرائیلی فورسز نے رہائشی عمارتوں پر فضائی حملے کیے جس سے متعدد عمارتیں منہدم ہوگئیں، فضائی حملوں کے باعث درجنوں افراد ملبے تلے دب گئے۔
عرب میڈیا کے مطابق 7 اکتوبر سے اب تک اسرائیلی بمباری سے شہید ہونے والے فلسطینیوں کی تعداد 7 ہزار 28 ہو گئی ہے جن میں 3 ہزار بچے اور 1 ہزار 709 خواتین شامل ہیں۔
صہیونی فوج نے مقبوضہ مغربی کنارے میں بھی 104 فلسطینیوں کو شہید کیا ہے۔ گزشتہ 24 گھنٹوں کے دوران اسرائیلی فوج نے 250 مقامات پر حملے کیے۔
اسرائیلی ڈیفنس فورس کا کہنا ہے کہ گزشتہ رات کئی مقامات پر ٹینکوں کے ذریعے ہدف کو نشانہ بنایا گیا، یہ زمینی حملہ اگلے اقدامات کی تیاری ہے۔