اردو ورلڈ کینیڈا ( ویب نیوز )سپریم کورٹ کے چیف جسٹس عمر عطا بندیال کا کہنا ہے کہ نیب کے نئے قانون میں خامیاں ہیں جنہیں دیکھ رہے ہیں۔
سپریم کورٹ میں 23 کروڑ روپے کرپشن کے ملزم نواب خان کی درخواست ضمانت پر سماعت ہوئی۔ چیف جسٹس عمر عطا بندیال نے اپنے ریمارکس میں کہا کہ نیب کے نئے قانون میں کچھ خامیاں ہیں جو ہم دیکھ رہے ہیں۔
چیف جسٹس نے استفسار کیا کہ کیا نیب کے نئے قانون میں یہ نہیں لکھا ہے کہ کیس کہاں بھیجے جائیں؟ صرف 23 کروڑ روپے کی کرپشن ہے 50 کروڑ کی نہیں۔ کیا نیب کے دائرہ اختیار سے باہر کیسز ختم ہو چکے ہیں؟
نیب پراسیکیوٹر نے عدالت کو بتایا کہ نیب مقدمات واپس نہیں لے رہا، عدالتیں مقدمات واپس کر رہی ہیں۔ نیب کے نئے قانون کے بعد 23 کروڑ روپے کی کرپشن کا کیس نیب کے دائرہ اختیار سے باہر چلا گیا۔ کیس نیب کے دائرہ اختیار سے باہر جانے پر ملزم کی ضمانت منسوخی کی درخواست غیر موثر ہو گئی۔
سپریم کورٹ نے 23 کروڑ کی کرپشن کے ملزم نواب خان کی درخواست ضمانت غیر موثر قرار دے کر خارج کر دی۔
