اردو ورلڈ کینیڈا ( ویب نیوز ) ایران جنگ کے نتیجے میں پیدا ہونے والے عالمی توانائی بحران نے کینیڈا میں پیٹرول اور ڈیزل کی قیمتوں کو تیزی سے بڑھا دیا ہے
اور ماہرین کے مطابق آنے والے ایسٹر لانگ ویک اینڈ کے دوران یہ قیمتیں مزید بڑھ سکتی ہیں۔ گیس بڈی کے تجزیہ کار پیٹرک ڈی ہان کا کہنا ہے کہ عالمی منڈی میں خام تیل کی قیمتوں میں حالیہ دنوں میں تقریباً 10 فیصد اضافہ ہوا ہے، جس کے باعث ملک میں پیٹرول کی اوسط قیمت تقریباً 1.80 کینیڈین ڈالر فی لیٹر تک پہنچ گئی ہے اور صرف ایک ہفتے میں تقریباً 9 سینٹ فی لیٹر اضافہ ریکارڈ کیا گیا ہے، جبکہ ڈیزل کی قیمت آئندہ 48 گھنٹوں میں 2.25 ڈالر فی لیٹر سے تجاوز کر کے نیا ریکارڈ قائم کر سکتی ہے۔
ماہرین کے مطابق قیمتوں میں اس تیزی کی بنیادی وجہ ایران کی جانب سے آبنائے ہرمز میں تیل کی ترسیل میں رکاوٹ ہے، جو عالمی سطح پر تیل کی فراہمی کے لیے نہایت اہم راستہ ہے۔ اس صورتحال نے نہ صرف سپلائی چین کے اخراجات میں اضافہ کیا ہے بلکہ ہوائی سفر بھی مہنگا کر دیا ہے کیونکہ جیٹ فیول کی قیمت تقریباً دوگنی ہو چکی ہے، جبکہ ڈیزل مہنگا ہونے سے اشیائے ضروریہ کی ترسیل کے اخراجات بھی بڑھ گئے ہیں۔ اس کے نتیجے میں عام صارفین کو روزمرہ زندگی میں بڑھتے ہوئے اخراجات کا سامنا کرنا پڑ رہا ہے۔
رپورٹ کے مطابق کینیڈا کے ساحلی علاقوں جیسے برٹش کولمبیا، کیوبیک اور میری ٹائمز میں قیمتوں میں زیادہ اضافہ دیکھا جا رہا ہے کیونکہ یہ علاقے عالمی منڈی کے ساتھ زیادہ منسلک ہیں، جبکہ اندرونی علاقوں جیسے البرٹا میں قیمتیں نسبتاً کم ہیں۔ ماہرین نے خبردار کیا ہے کہ جب تک ایران جنگ اور آبنائے ہرمز کی صورتحال میں بہتری نہیں آتی، تیل کی قیمتیں بلند رہیں گی اور اس کے اثرات کینیڈا سمیت عالمی معیشت پر بدستور پڑتے رہیں گے۔ اس تناظر میں ایسٹر ویک اینڈ پر سفر کرنے والے افراد کو زیادہ اخراجات کے لیے تیار رہنا چاہیے، جبکہ مجموعی طور پر توانائی بحران نے معیشت پر دباؤ بڑھا دیا ہے۔
