اردوورلڈکینیڈا( ویب نیوز)وزیرِ دفاع خواجہ آصف نے خبردار کیا ہے کہ بھارت کے ساتھ جنگ کا خطرہ اب بھی موجود ہے اور مئی کی جنگ کے فوراً بعد اس امکان کو خاص طور پر محسوس کیا گیا تھا۔ ان کے مطابق بھارت اپنی ناکامی اور بے عزتی کا بدلہ افغانستان کے ذریعے لینے کی کوشش کر رہا ہے، جبکہ عالمی برادری پاکستان کی صلاحیتوں کی تعریف کر رہی ہے۔
خواجہ آصف نے کہا کہ بھارت کے خلاف پاکستان کی حالیہ فتح کو امریکہ نے بھی تسلیم کیا ہے، اور امریکی صدر نے مداخلت کرکے ممکنہ جنگوں کو ختم کروانے میں مدد فراہم کی۔ وزیر دفاع نے بتایا کہ پراکسی وار آج بھی جاری ہے اور یہ دہائیوں سے ایک عام حربہ رہا ہے، جو جدید جنگی حربوں کا حصہ بن چکا ہے۔
ان کا کہنا تھا کہ کابل کی سرزمین پاکستان کے خلاف استعمال ہو رہی ہے، اور پاکستان نے اس حوالے سے افغانستان کو واضح ثبوت فراہم کیے ہیں۔ افغان طالبان کے اندرونی تنازعات بھی ملک میں غیر یقینی صورتحال پیدا کر رہے ہیں۔ وزیر دفاع نے مزید کہا کہ افغانستان کی جانب سے جو بیانات دیے جا رہے ہیں وہ سراسر جھوٹ پر مبنی ہیں۔ پاکستان نے افغانستان کے ساتھ تین بار مذاکرات کیے، لیکن دہشت گردوں کے حملے جاری رہے، جن میں وانا حملے میں افغان دہشت گرد ملوث تھے۔ پاکستان ان حملوں کا جواب دینے کے لیے بھرپور اقدامات کرے گا۔
خیال رہے کہ مئی میں معرکہ حق کے دوران پاکستان نے بھارت کو شدید نقصان پہنچایا تھا۔ پاک فضائیہ نے بھارت کے رافیل سمیت سات طیارے مار گرائے تھے اور ایس 400 دفاعی نظام کو بھی تباہ کیا گیا تھا، جس سے پاکستان کی عسکری صلاحیتوں کو عالمی سطح پر تسلیم ملی۔
خواجہ آصف کے بیان میں نہ صرف بھارت کے ساتھ موجودہ کشیدگی کا ذکر ہے بلکہ پاکستان کی دہشت گردی کے خلاف اقدامات اور دفاعی حکمت عملی کی وضاحت بھی شامل ہے۔
