اردو ورلڈ کینیڈا ( ویب نیوز ) پاکستان تحریک انصاف کے چیئرمین بیرسٹر گوہر نے واضح کیا ہے کہ

سابق وزیر اعلیٰ خیبرپختونخوا علی امین گنڈاپور کے خلاف پارٹی کی طرف سے کسی کارروائی کا فیصلہ نہیں کیا گیا۔اپنے بیان میں بیرسٹر گوہر نے کہا کہ علی امین گنڈاپور کے خلاف شائع کی جانے والی خبریں من گھڑت اور حقیقت سے بعید ہیں۔ انہوں نے مزید کہا کہ پارٹی کے اندرونی اختلافات کے باوجود ترجیح صرف بانی پاکستان تحریک انصاف عمران خان کی رہائی ہونی چاہیے۔
چیئرمین پی ٹی آئی نے علی امین گنڈاپور سے گزارش کی کہ وہ پارٹی کے اندر اختلافات کو ہوا نہ دیں۔ علی امین گنڈاپور نے بھی ویڈیو بیان میں معذرت کرتے ہوئے بڑا پن دکھایا اور کہا کہ اگر ان کے غصے سے کسی کا دل دکھا ہے تو وہ معذرت خواہ ہیں، تاہم ان کا غصہ جائز تھا کیونکہ اب تک چھوٹی چھوٹی جائز درخواستیں بھی پوری نہیں ہو سکیں، جیسے کہ بانی پی ٹی آئی عمران خان کو ان کا ذاتی معالج فراہم کرنا۔
واضح رہے کہ علی امین گنڈاپور نے پہلے ایک بیان میں کہا تھا کہ مقبولیت کے باوجود عمران خان کو جیل سے نکالنے میں مشکلات کا سامنا ہے اور بعض اوقات ان کی کوششیں استعمال ہو رہی ہیں، جس پر انہوں نے بعد ازاں عوام سے معذرت بھی کی۔