اردوورلڈکینیڈا( ویب نیوز)محمد شہباز شریف نے کہا ہے کہ پاکستان کی عوام اور مسلح افواج ملک کی سلامتی، خودمختاری اور علاقائی یکجہتی کے تحفظ کے لیے ہر وقت تیار ہیں۔ انہوں نے واضح کیا کہ قومی دفاع کو ہر حال میں یقینی بنایا جائے گا اور کسی بھی خطرے کو برداشت نہیں کیا جائے گا۔
وزیراعظم نے کہا کہ پاک فوج کا عزم ہے کہ ملک کے امن و سلامتی پر کسی قسم کی آنچ نہیں آنے دی جائے گی۔ انہوں نے کہا کہ مسلح افواج کسی بھی جارحانہ منصوبے کو ناکام بنانے کی مکمل صلاحیت رکھتی ہیں اور وطن کے دفاع کے لیے پوری طرح تیار ہیں۔
انہوں نے مزید کہا کہ آرمی چیف اور دفاعی فورسز کے سربراہ عاصم منیر کی قیادت میں افواجِ پاکستان قومی جذبے کے ساتھ اپنے فرائض انجام دے رہی ہیں۔ ان کے مطابق پاکستانی افواج اعلیٰ پیشہ ورانہ مہارت، جدید تربیت اور مضبوط دفاعی حکمت عملی سے لیس ہیں اور اندرونی یا بیرونی ہر طرح کے چیلنج سے مؤثر انداز میں نمٹنے کی صلاحیت رکھتی ہیں۔
وزیراعظم نے کہا کہ وطن کے دفاع پر کسی صورت سمجھوتہ نہیں کیا جائے گا اور ہر ممکن جارحیت کا منہ توڑ جواب دیا جائے گا۔ انہوں نے کہا کہ پاکستان ہمیشہ خطے میں امن کے فروغ کا خواہاں رہا ہے لیکن قومی خودمختاری اور سلامتی کو اولین ترجیح دی جائے گی۔
انہوں نے مزید کہا کہ پوری قوم اپنی مسلح افواج کے ساتھ شانہ بشانہ کھڑی ہے اور قومی دفاع کے لیے اتحاد اور یکجہتی کا مظاہرہ جاری رکھے گی۔
