اردوورلڈکینیڈا( ویب نیوز)وفاقی وزیر داخلہ محسن نقوی نے کہا ہے کہ سرحد پار سے دہشت گردی کی کوششیں ہو رہی ہیں، تاہم پاک فوج نے واضح پیغام دیا ہے کہ دہشت گردوں سے کسی قسم کا سمجھوتہ نہیں ہوگا۔ کیڈٹ کالج وانا پر حملہ کرنے والے درندے ہیں اور ان کا انسانیت سے کوئی تعلق نہیں۔
وانا میں قبائلی عمائدین سے گفتگو کرتے ہوئے محسن نقوی نے کہا کہ ملک میں امن تباہ کرنے کی کسی کو اجازت نہیں دی جائے گی۔ انہوں نے واضح کیا کہ اسلام آباد میں کچہری حملے میں بھی افغان دہشت گرد ملوث ہیں۔
اس موقع پر قبائلی عمائدین نے کہا کہ پاک فوج دن رات ہماری حفاظت کے لیے قربانیاں دے رہی ہے اور علاقے میں تعمیر و ترقی پر حکومت کے شکر گزار ہیں۔ انہوں نے کہا کہ حکومت ہمارے بچوں کو اعلیٰ تعلیم فراہم کر رہی ہے اور ہم کسی بھی قسم کی دہشت گردی کی حمایت نہیں کرتے، ہم ٹی ٹی پی کو نہیں مانتے۔
قبل ازیں وفاقی وزیر داخلہ محسن نقوی نے کیڈٹ کالج وانا کا دورہ کیا، جہاں آئی جی فرنٹیئر کور خیبرپختونخوا ساوتھ میجر جنرل مہر عمر خان نے ان کا استقبال کیا۔ اس موقع پر انہوں نے خوارجی حملہ آوروں کا حملہ ناکام بنانے اور تمام کیڈٹس و اساتذہ کو بحفاظت ریسکیو کرنے والے پاک فوج کے بہادر افسران اور جوانوں سے ملاقات کی۔
محسن نقوی نے کالج کے طلباء اور اساتذہ سے ملاقات میں ان کے بلند حوصلے اور جذبے کی تعریف کی اور انہیں خوارجیوں کے حملے کی تفصیلات اور پاک فوج و فرنٹیئر کور کی جانب سے کیے گئے کامیاب ریسکیو آپریشن پر بریفنگ دی۔
وزیر داخلہ نے کہا کہ یہ دہشت گرد نہیں بلکہ درندے ہیں، جن کا انسانیت سے کوئی تعلق نہیں، اور کوئی مذہب بچوں کو نشانہ بنانے کی اجازت نہیں دیتا۔ انہوں نے پاک فوج اور ایف سی کے بہادر افسران اور جوانوں کی جرات، فرض شناسی اور پیشہ ورانہ مہارت کو سراہتے ہوئے کہا کہ دشمن کا منصوبہ سانحہ اے پی ایس جیسی کارروائی دہرانا تھا، لیکن دلیر جوانوں نے حملہ ناکام بنا دیا اور خوارجیوں کو شکست دی۔
محسن نقوی نے اعلان کیا کہ کیڈٹ کالج وانا کی بہترین انداز میں تزئین و آرائش کی جائے گی تاکہ طلباء کو محفوظ اور معیاری تعلیمی ماحول فراہم کیا جا سکے۔ انہوں نے کہا کہ تمام طلباء کو بحفاظت نکالنے والے افسران اور جوان قوم کے ہیرو ہیں اور پاکستان کو ان پر فخر ہے۔
