اردوورلڈ کینیڈا ( ویب نیوز )نگران وزیراعظم انوار الحق کاکڑ نے کہا کہ ہمارے پاس اپنے اقتدار کو طول دینے کا کوئی پروگرام نہیں، معاشی اور سیاسی فیصلے ملکی مفاد میں ہو رہے ہیں۔
نگراں وزیراعظم انوارالحق کاکڑ نے نجی ٹی و ی میں خصوصی گفتگو کرتے ہوئے کہا کہ اللہ قائداعظم کے درجات بلند کرے، ہماری توجہ معیشت کی بحالی پر ہے معیشت کی بہتری کے لیے اقدامات کررہے ہیں، وفاقی اور صوبائی نگراں حکومتوں کا مختلف معاملات پر یکساں موقف ہے آئین اور قانون کے مطابق تمام شہری برابر ہیں، کسی سیاسی جماعت پر کوئی پابندی نہیں۔
انوارالحق کاکڑ نے کہا کہ تحریک انصاف پر بطور جماعت پابندی نہیں لگائی گئی
ان کا کہنا تھا کہ نواز شریف کی آمد کا علم نہیں، وہ کب ملک آئیں گے، نواز شریف تین بار وزیراعظم رہ چکے ہیں، مروجہ قوانین کے مطابق انہیں کوئی استحقاق ہے تو ملے گا۔ نواز شریف کا کیس عدالتوں کے ہاتھ میں ہے۔
نگراں وزیراعظم نے کہا کہ بہت سے لوگوں کی رائے ہے کہ الیکشن کے بعد بھی استحکام نہیں آئے گا تو کیا ہمیں الیکشن میں نہیں جانا چاہیے۔ ہمیں سیاسی استحکام کے ساتھ ساتھ چلنا ہو گا، پارلیمنٹ نے قانون پاس کیا ہے، قانون کے تحت الیکشن کمیشن کو الیکشن کی تاریخ دینے کا اختیار دیا گیا ہے۔
دہشت گردی کسی صورت قبول نہیں، پاکستان کے افغانستان کے ساتھ کثیرالجہتی تعلقات ہیں، ایس آئی ایف سی کے تحت معاشی بحالی کے اقدامات جاری ہیں، افغانستان کو سیکیورٹی چیلنجز کا سامنا ہے، افغانستان سمجھتا ہے کہ اس کے ہمسایہ ممالک ناقابل واپسی ہیں، اسلحہ افغانستان کے گینگز کے ہاتھ میں جاچکا ہے۔ .
