اردو ورلڈ کینیڈا ( ویب نیوز)دہشت گردی کے خطرے کے پیش نظر وفاقی دارالحکومت میں سکیورٹی کو ریڈ الرٹ کر دیا گیا ہے جب کہ قانون نافذ کرنے والے اداروں نے ممکنہ خودکش حملہ آور کی تصویر بھی جاری کر دی ہے۔
ذرائع کے مطابق قانون نافذ کرنے والے اداروں کو انٹیلی جنس ذرائع سے اطلاع ملی تھی کہ ممکنہ دہشت گرد ذاکر خان ولد خیبرپختونخوا سے دہشت گردی کے لیے وفاقی دارالحکومت اسلام آباد میں داخل ہونے کی کوشش کرے گا۔
قانون نافذ کرنے والے اداروں نے ممکنہ دہشت گردی کے خدشے کے پیش نظر پولیس کو رپورٹ دے دی ہے جس کے بعد اسلام آباد میں سکیورٹی الرٹ جاری کر دی گئی ہے اور سکیورٹی کے انتظامات مزید سخت کر د ئیے گئے ہیں۔
پولیس کے مطابق اسلام آباد کی سیکیورٹی کے پیش نظر مختلف مقامات پر چیکنگ شروع کردی گئی ہے جس کے باعث لوگوں کو دفاتر اور کاروباری مقامات پر پہنچنے میں تاخیر کا سامنا کرنا پڑ سکتا ہے۔
دہشت گردی کے خدشے کے پیش نظر سخت حفاظتی اقدامات کے باعث شہریوں کو دفاتر یا کاروباری مقامات پر جانے کے لیے 15 سے 20 منٹ قبل نکلنے کا مشورہ دیا گیا ہے
پولیس نے شہریوں سے اپیل کی ہے کہ وہ چیکنگ کے دوران اہلکاروں کے ساتھ تعاون کریں اور کسی بھی غیر معمولی سرگرمی کی اطلاع فوری طور پر 15 پر کریں۔
واضح رہے کہ گزشتہ جمعہ کو بھی وفاقی دارالحکومت اسلام آباد کے علاقے آئی ٹین میں پولیس کی چیکنگ کے دوران گاڑی میں خودکش دھماکہ ہوا تھا۔
یہ بھی پڑھیں ۔۔۔۔۔
