اردوورلڈ کینیڈا ( ویب نیوز )وزیر مملکت برائے پیٹرولیم مصدق ملک نے کہا ہے کہ تین مختلف ممالک نے پاکستان میں سرمایہ کاری کے لیے 20 سے 25 ارب ڈالر مختص کیے ہیں، حقیقت میں اب یہ پلان اے اور آئی ایم ایف کا پلان بی ہے۔

حکومتی پلان کی وضاحت کرتے ہوئے انہوں نے کہا کہ جسے پلان بی کہا جا رہا تھا وہ آج عوام کے سامنے آ گیا ہے۔
انہوں نے کہا کہ اس طریقہ کار کے پیچھے سعودی عرب، متحدہ عرب امارات، قطر اور چین جیسے دوست ممالک کی جانب سے یقین دہانیاں ہیں، ان ممالک سے یہ فیصلہ کیا گیا ہے کہ وہ کن شعبوں میں سرمایہ کاری کریں گے۔
مصدق ملک نے کہا کہ سرمایہ کاروں کی سہولت کے لیے تین سطحوں پر کمیٹیاں تشکیل دی گئی ہیں جن میں سے ایک کی سربراہی وزیراعظم خود کریں گے جس میں کابینہ کے ارکان اور آرمی چیف بھی شامل ہوں گے۔
مصدق ملک کا مزید کہنا تھا کہ اجلاس میں آئندہ پانچ سے سات سال کے لیے 112 ارب ڈالر کی سرمایہ کاری کا منصوبہ پیش کیا گیا ہے۔