اردو ورلڈ کینیڈا ( ویب نیوز )پاکستان اور افغانستان کے درمیان طورخم بارڈر کراسنگ پر ایک لدے کنٹینر کے الٹنے سے تین افراد ہلاک اور سیکورٹی اہلکاروں سمیت پانچ دیگر زخمی ہو گئے۔
طورخم ایک اہم سرحدی گزرگاہ ہے جو پاکستان کے صوبہ خیبر پختونخواہ کو افغانستان کے صوبہ ننگرہار سے ملاتی ہے۔ یہ دونوں ممالک کے درمیان داخلے کا سب سے مصروف ترین مقام ہے، جو نقل و حمل کی ایک بڑی جگہ کے طور پر کام کرتا ہے۔
ریسکیو حکام نے بتایا کہ متفرق برآمدی سامان سے لدا کنٹینر زیرو پوائنٹ پر پیدل چلنے والوں پر گرا۔ ایف سی اہلکاروں اور افغان شہریوں سمیت آٹھ کے قریب افراد بھاری کنٹینر کے نیچے آ گئے۔
ان میں سے دو کی موقع پر ہی موت ہو گئی جبکہ زخمیوں کو علاج کے لیے لنڈی کوتل ہسپتال منتقل کر دیا گیا ہے۔ تاہم زخمیوں میں سے چار کی حالت تشویشناک ہے
حادثے کے باعث کئی گھنٹوں تک ٹریفک معطل رہی کیونکہ روزانہ کی بنیاد پر 600 سے زائد گاڑیاں طورخم بارڈر کراس کرتی ہیں۔
