اردوورلڈکینیڈا( ویب نیوز)پاکستان میں غیر قانونی طور پر مقیم افغان شہریوں کی واپسی کے لیے طورخم سرحد کو بیس دن بعد جزوی طور پر کھول دیا گیا ہے۔

ضلعی انتظامیہ کے مطابق سرحد کو فی الحال صرف افغان باشندوں کی بے دخلی کے لیے کھولا گیا ہے، جب کہ تجارت اور عام آمدورفت بدستور معطل ہے۔

ضلع خیبر کے ڈپٹی کمشنر بلال شاہد نے بتایا کہ طورخم امیگریشن سینٹر پر بڑی تعداد میں افغان شہری موجود ہیں جہاں عملہ ان کی دستاویزی جانچ پڑتال کے بعد افغانستان واپسی کی اجازت دے رہا ہے۔

ان کے مطابق 11 اکتوبر کو پاک افغان کشیدگی کے بعد سرحد مکمل طور پر بند کی گئی تھی، تاہم اب سرحدی گزرگاہ کو صرف بے دخلی کے عمل کے لیے محدود پیمانے پر بحال کیا گیا ہے۔

ادھر یو این ایچ سی آر کے ترجمان قیصر خان آفریدی نے بتایا کہ 8 اکتوبر تک مجموعی طور پر چھ لاکھ پندرہ ہزار سے زائد افغان شہری طورخم کے راستے اپنے وطن واپس جا چکے ہیں، اور مزید افراد کی واپسی کا سلسلہ بدستور جاری ہے۔