اردو ورلڈ کینیڈا ( ویب نیوز )مری میں ٹریفک پولیس نے برف باری کے انتظامات مکمل کر لیے ہیں جس کے تحت موسم کے دوران مال روڈ پر ٹریفک کے داخلے پر پابندی عائد کر دی گئی ہے۔
مری ٹریفک پولیس کے مطابق برفباری کے موسم میں ٹریفک کی روانی برقرار رکھنے کے لیے 270 سے زائد اہلکار تعینات کیے گئے ہیں جب کہ نئی پارکنگ ختم کرکے سیاحوں کی مدد کے لیے 5 لفٹرز اور ایک کرین فراہم کی گئی ہے۔

ٹریفک پولیس کے مطابق موسم سرما میں برف باری کے دوران 5 شاہراہوں کو ون وے قرار دے کر مری مال روڈ پر ٹریفک کے داخلے پر پابندی عائد کر دی گئی ہے جبکہ سہولت اور بروقت ٹریفک کے لیے سنی بینک چوکی پر ٹریفک کنٹرول روم قائم کر دیا گیا ہے۔ سیاحوں کی مدد کیلئے برف باری کے دوران تمام داخلی راستوں پر چوکیاں قائم کی جائیں گی۔
ٹریفک پولیس کا کہنا ہے کہ مکینیکل فٹ گاڑی اور لائسنس ہولڈر ڈرائیورز کو مری میں داخلے کی اجازت ہوگی، سیاحتی مقام مری میں 4 ہزار کے قریب پارکنگ کی گنجائش ہے، برف باری کے دوران ہیوی گاڑیوں کو مخصوص اوقات میں مری میں داخلے کی اجازت ہوگی۔