اردوورلڈ کینیڈا( ویب نیوز)امریکہ کے نو منتخب صدر ڈونالڈ ٹرمپ نے کئی بار کینیڈا کو امریکہ کی 51ویں ریاست بننے کی پیشکش کی ہے۔

اس معاملے پر تنازعہ مسلسل بڑھ رہا ہے۔ کینیڈا کے وزیر اعظم جسٹن ٹروڈو اور وزیر خارجہ میلانیا جولی کے بعد اب کینیڈا کی نیو ڈیموکریٹک پارٹی (این ڈی پی) کے رہنما اور رکن پارلیمنٹ جگمیت سنگھ نے بھی ٹرمپ کی پیشکش ٹھکرا دی ہے۔
جگمیت سنگھ نے ایکس پر ایک ویڈیو میں کہا ’’میرے پاس ڈونلڈ ٹرمپ کے لیے ایک پیغام ہے۔ ہمارا ملک برائے فروخت نہیں ہے۔ نہ اب ہے اور نہ ہی کبھی ہوگا۔ کینیڈین اپنے ملک پر فخر کرتے ہیں اور ہم اس کی حفاظت کے لیے ہر ممکن کوشش کرنے کو تیار ہیں۔
ٹیرف لگانے کی ٹرمپ کی دھمکی پر جگمیت سنگھ نے کہا کہ اگر ٹرمپ کو لگتا ہے کہ وہ ہم سے لڑ سکتے ہیں تو انہیں اس کی قیمت چکانی پڑے گی۔ میرا ماننا ہے کہ اگر ٹرمپ ہم پر ٹیرف لگاتا ہے تو ہمیں بھی جوابی ٹیرف لگانا چاہیے۔ جو بھی وزیر اعظم کے عہدے کے لیے انتخاب لڑ رہا ہے اسے ایسا ہی کرنا چاہیے۔
انہوں نے مزید کہا کہ کیلیفورنیا میں آگ گھروں کو تباہ کر رہی ہے، کینیڈا کے فائر فائٹرز مدد کے لیے پہنچ گئے ہیں۔ ہم ایسے ہی ہیں۔ ہمیشہ اپنے پڑوسیوں کی مدد کرتے ہیں۔