اردو ورلڈ کینیڈا ( ویب نیوز ) نومنتخب امریکی صدر ڈونلڈ ٹرمپ نے دھمکی دی ہے کہ وہ خلیج میکسیکو کا نام بدل کر خلیج امریکہ کر دیں گے اور کینیڈا کے خلاف اقتصادی طاقت استعمال کریں گے۔

فلوریڈا میں ایک پریس کانفرنس میں ڈونلڈ ٹرمپ نے متنبہ کیا کہ اگر وہ میکسیکو اور کینیڈا نے غیر قانونی امیگریشن اور منشیات کی اسمگلنگ کو نہ روکا تو ان پر 25 فیصد ٹیرف عائد کر دیں گے۔ ٹرمپ نے کہا کہ کینیڈا کو یہ نہیں بھولنا چاہیے کہ امریکہ اس کا دفاع کرتا ہے۔ڈونلڈ ٹرمپ نے یہ بھی مطالبہ کیا کہ امریکہ کو بھی قومی سلامتی کے مقاصد کے لیے گرین لینڈ حاصل کرنا چاہیے۔

اس کے علاوہ نومنتخب امریکی صدر نے نیٹو ممالک پر بھی زور دیا کہ وہ اپنے دفاعی بجٹ کو دوگنا کر دیں جب کہ انہوں نے کیپٹل ہل پر حملے میں ملوث فسادیوں کو معاف کرنے کا ارادہ ظاہر کیا۔ٹرمپ نے ایک بار پھر دھمکی دی ہے کہ اگر اسرائیلی یرغمالیوں کو واپس نہ کیا گیا تو مشرق وسطیٰ جہنم بن جائے گا۔دوسری جانب ڈونلڈ ٹرمپ نے ایک بار پھر حماس کو خبردار کیا ہے کہ وہ غزہ میں اسرائیلی یرغمالیوں کو رہا کرے۔پریس کانفرنس میں ٹرمپ نے کہا کہ اگر ان کے اقتدار سنبھالنے تک یرغمالیوں کو واپس نہ کیا گیا تو مشرق وسطیٰ جہنم بن جائے گا۔ٹرمپ نے کہا کہ یہ حماس کے لیے اچھا نہیں ہوگا لیکن یہ کسی کے لیے بھی اچھا نہیں ہوگا۔