اردوورلڈکینیڈا(ویب نیوز)کینیڈا کے وزیرِاعظم مارک کارنی نے بدھ کے روز برطانوی کولمبیا کے دور دراز قصبے ٹمبلر رج میں ہونے والی ہولناک اجتماعی فائرنگ کے بعد قوم سے خطاب کرتے ہوئے غم اور امید کا پیغام دیا۔ اس واقعے میں نو افراد جان سے گئے جبکہ درجنوں زخمی ہوئے، جس نے پورے ملک کو سوگ میں مبتلا کر دیا ہے۔

ہاؤس آف کامنز میں خطاب کے دوران وزیرِاعظم نے کہا کہ اس المناک سانحے نے پوری قوم کو صدمے میں مبتلا کر دیا ہے۔ انہوں نے ان تمام فرسٹ ریسپانڈرز اور RCMP اہلکاروں کا شکریہ ادا کیا جنہوں نے کسی ہچکچاہٹ کے بغیر ٹمبلر رج سیکنڈری اسکول میں داخل ہو کر کارروائی کی،
“یہ جانے بغیر کہ اندر ان کا سامنا کس خطرے سے ہوگا۔”

وزیرِاعظم نے اسکول کے عملے اور اساتذہ کو بھی خراجِ تحسین پیش کیا جنہوں نےغیر معمولی جرات کا مظاہرہ کرتے ہوئے اپنی نگرانی میں موجود بچوں کی حفاظت کی۔”انہوں نے کہا،سب سے تاریک لمحوں میں انہوں نے ہمارے ملک کی بہترین اقدار کو نمایاں کیا۔”

مارک کارنی نے ٹمبلر رج کا پس منظر بیان کرتے ہوئے کہا کہ یہ تقریباً 2,400 افراد پر مشتمل ایک چھوٹا سا قصبہ ہے جو راکی پہاڑوں کے دامن میں واقع ہے اور برٹش کولمبیا کے نسبتاً نئے شہروں میں شمار ہوتا ہے۔
انہوں نے کہایہ قصبہ 1980 کی دہائی میں جنگلات کو کاٹ کر آباد کیا گیا، جس کی بنیاد قدرتی وسائل کی معیشت اور یہاں کے باسیوں کے عزم پر رکھی گئی۔”

وزیرِاعظم کے مطابق ٹمبلر رج محنت کش لوگوں کا شہر ہے، جن میں کان کن، اساتذہ، تعمیراتی مزدور اور خاندان شامل ہیں، جو ہمیشہ ایک دوسرے کا سہارا بنتے رہے ہیں۔
انہوں نے ماضی کی مثالیں دیتے ہوئے کہا کہ جب جنگلاتی آگ نے علاقے کو خطرے میں ڈالا تو پڑوسیوں نے ایک دوسرے کو محفوظ مقامات پر منتقل ہونے میں مدد دی، بزرگوں اور اکیلے رہنے والوں کا خیال رکھا اور اس بات کو یقینی بنایا کہ کوئی پیچھے نہ رہ جائے۔
اسی طرح جب کوئلے کی کان بند ہوئی تو لوگوں نے مقامی کاروباروں کا ساتھ دیا، روزگار کے مواقع ایک دوسرے سے شیئر کیے اور اجتماعی حوصلے کے ساتھ مشکلات کا سامنا کیا۔

مارک کارنی نے بتایا کہ وفاقی حکام برٹش کولمبیا کے وزیرِاعلیٰ ڈیوڈ ایبی اور دیگر مقامی رہنماؤں سے رابطے میں ہیں تاکہ قومی سطح پر ردِعمل کو ہم آہنگ کیا جا سکے۔
انہوں نے کہا،
“آنے والے دنوں میں اہم سوالات بھی ہوں گے اور مشکل گفتگو بھی کرنی پڑے گی۔ ہم یہ سب متاثرین اور ان کے اہلِ خانہ کے حق میں کریں گے، مگر اس وقت غم، سوگ اور یاد کے لیے ہے۔ یہ وقت ٹمبلر رج اور پیس ریور ریجن کے ان لوگوں کے ساتھ کھڑے ہونے کا ہے جو ناقابلِ تصور درد سے گزر رہے ہیں۔”

انہوں نے مزید کہا کہ پوری قوم ان کے ساتھ سوگ منا رہی ہے۔طلبہ، اساتذہ، والدین اور ٹمبلر رج کے ہر شہری کے نام میرا پیغام ہے: پورا کینیڈا آپ کے ساتھ کھڑا ہے۔ جو ہم سے بچھڑ گئے، ان کی یادیں باعثِ برکت ہوں۔ یہ مضبوط کمیونٹی، جس نے پہلے بھی کئی بار ثابت قدمی دکھائی ہے، ایک بار پھر شفا اور بحالی کی قوت پائے۔”

اپوزیشن رہنماؤں کا اظہارِ تعزیت

وزیرِاعظم کے بعد کنزرویٹو پارٹی کے وفاقی رہنما پیئر پولی ایور نے پارلیمنٹ سے خطاب کرتے ہوئے متاثرہ خاندانوں سے دلی ہمدردی کا اظہار کیا۔انہوں نے کہا کہ وہ اس کرب کا تصور بھی نہیں کر سکتے جس سے ٹمبلر رج کے والدین اس وقت گزر رہے ہیں۔
“بطور والد، ہم دونوں جانتے ہیں کہ بچوں کو اسکول بھیجتے وقت والدین کس امید کے ساتھ رخصت کرتے ہیں کہ وہ کھیلیں گے، سیکھیں گے، ہنسیں گے، اور سب سے بڑھ کر شام کو محفوظ واپس آئیں گے۔”انہوں نے کہا،کسی بھی والدین کو یہ خوف نہیں ہونا چاہیے کہ ان کا بچہ اسکول سے واپس نہیں آئے گا۔”

پولی ایور نے اس لمحے کو بھی یاد کیا جب کنزرویٹو رکنِ پارلیمنٹ باب زیمر نے انہیں فون کر کے اس واقعے کی اطلاع دی۔
انہوں نے کہا،وہ بچے جو ہوم ورک اور ہاکی کے بارے میں سوچ رہے ہونے چاہئیں تھے، اچانک خوف، غم اور ناقابلِ برداشت بے یقینی کا شکار ہو گئے۔”

ان کے مطابق نو زندگیاں ضائع ہوئیں، 25 افراد زخمی ہوئے، اور پورا قصبہ غم میں ڈوبا ہوا ہے۔
انہوں نے ٹمبلر رج کو کینیڈا کی بہترین اقدار کی نمائندگی قرار دیتے ہوئے کہا کہ یہ محنت کش کان کنوں اور جنگلاتی مزدوروں کی کمیونٹی ہے، جو اپنے مسائل خود حل کرتی ہے مگر ضرورت پڑنے پر ہمسائے کی مدد سے کبھی پیچھے نہیں ہٹتی۔

پولی ایور نے براہِ راست واقعہ دیکھنے والے طلبہ سے بھی مخاطب ہو کر کہا کہ وہ ان کے صدمے کا اندازہ نہیں لگا سکتے، مگر پوری دنیا ان کے بارے میں سوچ رہی ہے۔انہوں نے فرسٹ ریسپانڈرز کا شکریہ ادا کرتے ہوئے کہا کہ ہم سب ان کے شکر گزار ہیں اور ہمیشہ رہیں گے۔”

دیگر جماعتی رہنماؤں کے بیانات

بلاک کیوبیکوا کے رہنما ایوز فرانسوا بلانشیٹ نے بھی پارلیمنٹ میں خطاب کرتے ہوئے، جزوی طور پر انگریزی میں، متاثرہ خاندانوں سے تعزیت کا اظہار کیا اور زخمیوں اور پوری کمیونٹی کے ساتھ مکمل یکجہتی کا اعلان کیا۔

این ڈی پی کے عبوری رہنما ڈان ڈیوس نے کہا کہ کوئی بھی الفاظ اس خلا کو پُر نہیں کر سکتے جو متاثرہ خاندان اور ٹمبلر رج کی کمیونٹی محسوس کر رہی ہے، مگر انہوں نے امید ظاہر کی کہ وہ ایک ایسی قوم کی قربت محسوس کریں گے جو آج، کل اور آنے والے مشکل دنوں میں ان کے ساتھ کھڑی ہے۔

گرین پارٹی کی رہنما الزبتھ مے نے کہا کہ پارلیمنٹ کے اراکین اپنی بساط کے مطابق متاثرہ افراد کے درد، تکلیف اور غم کو کم کرنے کی کوشش کریں گے۔