253
اردو ورلڈ کینیڈا ( ویب نیوز)کراچی پولیس ہیڈ آفس (کے پی او) کو کلیئر کرنے کے لیے قانون نافذ کرنے والے اداروں کے آپریشن کے دوران مارے گئے تین میں سے دو دہشت گردوں کی شناخت ہو گئی ہے۔
پولیس ذرائع کے مطابق دونوں دہشت گردوں کا تعلق صوبہ خیبرپختونخوا سے تھا، ایک دہشت گرد کی شناخت کفایت اللہ ولد مرز علی خان کے نام سے ہوئی ہے جو لکی مروت کا رہائشی تھا۔
پولیس کا کہنا ہے کہ دوسرے دہشت گرد کی شناخت ذلا نور علی ولد وزیر رحمان کے نام سے ہوئی ہے اور اس کا تعلق شمالی وزیرستان سے ہے۔
پولیس ذرائع کا کہنا ہے کہ دونوں مارے گئے دہشت گردوں کا مزید ریکارڈ چیک کیا جا رہا ہے اور اس مقصد کے لیے ان کے فنگر پرنٹس بھی نادرا کو بھجوا دیے گئے ہیں۔
واضح رہے کہ گزشتہ روز کراچی پولیس آفس (کے پی او) پر دہشت گردوں کے حملے میں 2 پولیس افسران اور رینجرز اہلکاروں سمیت 4 افراد شہید ہوئے تھے جب کہ پولیس اور قانون نافذ کرنے والے اداروں کی جوابی کارروائی میں 3 دہشت گرد مارے گئے تھے اور عمارت کو نقصان پہنچا تھا۔ . تقریباً 4 گھنٹے بعد آپریشن مکمل کیا گیا تھا
