اردو ورلڈ کینیڈا ( ویب نیوز ) قطر سے روانگی کے موقع پر صحافیوں سے بات کرتے ہوئے اینٹونی بلینکن کا کہنا تھا کہ غزہ سے اسرائیلی دفاعی فورس کے انخلاء پر اتفاق دوحہ میں ہونے والے مذاکرات میں ہوا ہے تاکہ غزہ جنگ بندی معاہدے کو قریب لایا جا سکے۔انٹونی بلینکن نے کہا کہ غزہ سے اسرائیلی دفاعی افواج کے انخلاء کے شیڈول اور مقام سے متعلق معاہدہ بالکل واضح ہے اور اسرائیل نے اس پر رضامندی ظاہر کی ہے۔
امریکی وزیر خارجہ نے گزشتہ ہفتے ہونے والے مذاکرات میں طے پانے والے نکات کے بارے میں تفصیلات بتانے سے گریز کیا تاہم ان کا کہنا تھا کہ جنگ بندی کا معاہدہ طے پا گیا ہے جس پر تین مرحلوں میں عمل درآمد کیا جائے گا اور غزہ سے اسرائیلی دفاعی افواج کا انخلاء ہوگا۔ انٹونی بلینکن نے کہا کہ اسرائیلی وزیر اعظم نے ملاقات کے دوران انہیں امریکہ کی طرف سے تجویز کردہ جنگ بندی کے معاہدے سے اتفاق کرنے کے بارے میں آگاہ کیا تھا۔