اردوورلڈ کینیڈا( ویب نیوز)امریکی نائب صدر اور ڈیموکریٹک صدارتی امیدوار کملا ہیرس نے اپنے مخالف ریپبلکن صدارتی امیدوار ڈونلڈ ٹرمپ کو بزدل قرار دیا ہے۔
غیر ملکی میڈیا رپورٹس کے مطابق پنسلوانیا میں اپنی انتخابی مہم کے دوران ٹرمپ کو تنقید کا نشانہ بناتے ہوئے کملا ہیرس نے کہا کہ 5 نومبر کو ہونے والے صدارتی انتخابات میں انہیں ایک بزدل امیدوار کا سامنا ہے جس کی پالیسی صرف مخالفین کو نیچا دکھانے کی ہے۔
کملا ہیرس نے کہا کہ گزشتہ چند سالوں سے یہ غلط روایت چلی آ رہی ہے کہ کسی لیڈر کی طاقت اور قابلیت کا اندازہ اس سے لگایا جائے گا کہ اس نے کس کو گرایا ہے، جب کہ ہم جانتے ہیں کہ یہ اصل معیار نہیں ہے۔
انہوں نے کہا کہ لیڈر کو پرکھنے کا معیار یہ نہیں کہ اس نے کس کو گرایا یا رسوا کیا بلکہ اصل معیار یہ ہے کہ آپ کے لیڈر نے کس کو اوپر اٹھایا۔
کملا ہیرس نے ڈونلڈ ٹرمپ کا براہ راست نام لینے سے گریز کرتے ہوئے کہا کہ جو بھی دوسروں کو نیچا دکھانے کی کوشش میں مصروف ہے وہ بزدل ہے۔
واضح رہے کہ امریکا میں صدارتی انتخابات نومبر کے پہلے ہفتے میں ہو رہے ہیں جس میں کملا ہیرس اور ڈونلڈ ٹرمپ کے درمیان سخت مقابلہ متوقع ہے۔
34
