اردو ورلڈ کینیڈا ( ویب نیوز ) امریکا کے نائب صدر جے ڈی وینس ایران کے ساتھ مجوزہ جنگ بندی مذاکرات کے سلسلے میں اعلیٰ سطحی وفد کے ہمراہ اسلام آباد پہنچ گئے ہیں
جہاں اہم سفارتی سرگرمیاں عروج پر ہیں۔ذرائع کے مطابق امریکی نائب صدر کے ہمراہ آنے والے وفد میں اعلیٰ حکام اور سفارتی نمائندے شامل ہیں، جو ایران کے ساتھ جاری کشیدگی کم کرنے اور ممکنہ جنگ بندی پر بات چیت کریں گے۔ اسلام آباد آمد پر امریکی وفد کا پرتپاک استقبال کیا گیا، جبکہ سکیورٹی کے سخت انتظامات بھی کیے گئے ہیں۔
یہ مذاکرات ایک ایسے وقت میں ہو رہے ہیں جب خطے میں کشیدگی بڑھ چکی ہے اور عالمی برادری کی نظریں ان بات چیت پر مرکوز ہیں۔ تجزیہ کاروں کے مطابق یہ مذاکرات نہ صرف ایران اور امریکا کے تعلقات بلکہ پورے مشرقِ وسطیٰ کی صورتحال پر گہرے اثرات مرتب کر سکتے ہیں۔دوسری جانب ایران کا اعلیٰ سطحی وفد بھی پہلے ہی اسلام آباد میں موجود ہے، جس کی قیادت ایرانی پارلیمنٹ کے اسپیکر کر رہے ہیں۔ دونوں ممالک کے درمیان آج اور آئندہ چند روز میں اہم ملاقاتوں کا سلسلہ جاری رہنے کا امکان ہے۔
سفارتی ذرائع کا کہنا ہے کہ ان مذاکرات میں جنگ بندی، پابندیوں میں نرمی اور باہمی اعتماد کی بحالی جیسے اہم نکات زیر غور آئیں گے۔ تاہم ماضی کے تجربات کے باعث فریقین کے درمیان اعتماد کا فقدان اب بھی ایک بڑا چیلنج سمجھا جا رہا ہے۔پاکستانی حکام کے مطابق ملک اس حساس مرحلے پر ثالثی کا کردار ادا کر رہا ہے اور کوشش کی جا رہی ہے کہ دونوں ممالک کو مذاکرات کی میز پر لا کر خطے میں امن کو فروغ دیا جا سکے۔
