اردو ورلڈ کینیڈا ( ویب نیوز )پاکستان تحریک انصاف کے سینیٹر علی ظفر نے کہا ہے کہ توڑ پھوڑ انفرادی فعل ہے جس کی بنیاد پر کسی جماعت پر پابندی نہیں لگائی جا سکتی۔

سپریم کورٹ کے باہر میڈیا سے بات کرتے ہوئے سینیٹر علی ظفر نے کہا کہ ماضی میں جماعت اسلامی پر پابندی لگانے کی کوشش کی گئی، سپریم کورٹ قرار دے چکی ہے کہ آپ کسی سیاسی جماعت پر پابندی نہیں لگا سکتے، اگر پی ٹی آئی پر پابندی لگائی جائے تو سپریم کورٹ ایک دن میں اسے کالعدم قرار دے گی۔

انہوں نے کہا کہ قوانین پر عمل نہیں ہو رہا، اس وقت 2 صوبوں میں کوئی اسمبلی نہیں، میری نظر میں آئین کا قتل ہوا، عدالتیں ضمانتیں دیتی ہیں، جیل سے نکلتے ہی کسی اور کیس میں گرفتار کر لیا جاتا ہے، یہ لاقانونیت ہے. ہاں اس پر پٹیشن دائر کر رہے ہیں، عدالت کارروائی کرے گی۔

سینیٹر علی ظفر نے کہا کہ اسمبلیاں نہ ہوں تو سمجھتا ہوں آئین نہیں چل سکتا، عدالتوں کے احکامات نہ مانے گئے تو لوگوں کا عدالتوں سے اعتماد اٹھ جائے گا۔ پاکستان کے قیام سے لے کر آج تک ہزاروں ایسے قوانین موجود ہیں جنہیں عدالتیں کالعدم قرار دے چکی ہیں، انہیں عدالتوں اور پارلیمنٹ کے درمیان ٹکرا ئونہ سمجھا جائے۔