اردوورلڈ کینیڈا( ویب نیوز)ویڈیو بیان کیس کے بعد بشریٰ بی بی کی مشکلات بڑھ گئیں، راجن پور میںعمران خان کی اہلیہ کے خلاف ٹیلی گراف ایکٹ 1885 کے تحت الگ الگ مقدمات درج کر لیے گئے۔ .
پنجاب کے علاقے ڈیرہ غازی خان کے تھانہ جمال خان میں بشریٰ بی بی کے خلاف غلام یاسین نامی شخص کی شکایت پر مقدمہ درج کر لیا گیا ہے۔
ایف آئی آر میں مدعی نے موقف اختیار کیا کہ اس نے بشریٰ بی بی کا بیان نجی چینل پر سنا جو پاکستان اور سعودی عرب کے تعلقات خراب کرنے کی سازش معلوم ہوتا ہے۔
مدعی نے موقف اختیار کیا کہ بشریٰ بی بی کا ویڈیو بیان پاکستانی عوام کے جذبات کو ٹھیس پہنچانے کے مترادف ہے اور یہ ایک سوچی سمجھی سازش ہے لہٰذا بشریٰ بی بی کے خلاف قانون کے مطابق کارروائی کی جائے۔
اس کے علاوہ راجن پور میں بشریٰ بی بی کے خلاف تھانہ محمد پور گم والا میں حاکم نامی شہری کی شکایت پر ٹیلی گراف ایکٹ 1885 کے تحت مقدمہ درج کیا گیا ہے جبکہ سٹی تھانہ لیہ میں سہیل اشفاق نامی شخص کی شکایت پر مقدمہ درج کیا گیا ہے ۔
