اردو ورلڈ کینیڈا ( ویب نیوز ) امریکی صدر ڈونلڈ ٹرمپ نے انکشاف کیا ہے کہ بھارت کی جانب سے پاکستان کے خلاف ایک نئی جنگ شروع ہونے کا خدشہ تھا

جسے انہوں نے روکنے میں اہم کردار ادا کیا۔وائٹ ہاؤس میں سعودی ولی عہد محمد بن سلمان کے ساتھ ملاقات کے دوران ٹرمپ نے کہا کہ انہیں اس بات پر فخر ہے کہ وہ دنیا میں آٹھ بڑے تنازعات کو بھڑکنے سے بچا چکے ہیں۔ ان کے مطابق، پاکستان اور بھارت کے درمیان نہ صرف پہلے کشیدگی کم کرائی بلکہ ایک ایسا تنازع بھی ٹال دیا جو دوبارہ بھڑک سکتا تھا۔
صدر ٹرمپ نے مزید کہا کہ دونوں ممالک اب مثبت اقدامات کی طرف بڑھ رہے ہیں اور وہ تجارت کو بنیاد بنا کر عالمی سطح پر تنازعات کم کرنے کی کوشش کر رہے ہیں۔انہوں نے روس اور یوکرین کے درمیان جاری جنگ کے جلد خاتمے کی امید بھی ظاہر کی، تاہم اعتراف کیا کہ انہیں اندازہ نہیں تھا کہ جنگ بندی کا معاملہ اتنی طویل شکل اختیار کر لے گا۔
صحافیوں سے گفتگو میں ٹرمپ نے ایران کے ساتھ نئے جوہری معاہدے پر بات کرتے ہوئے بتایا کہ تہران معاہدے کا خواہش مند ہے، اور امریکا بھی اس حوالے سے بات چیت کے لیے تیار ہے۔ ان کا کہنا تھا کہ مذاکرات کا ابتدائی سلسلہ شروع ہو چکا ہے۔