اردو ورلڈ کینیڈا ( ویب نیوز ) سیکرٹری جنرل اقوام متحدہ نے اقوام متحدہ کی کمیٹی کے اجلاس سے خطاب کرتے ہوئے کہا کہ حل تلاش کرنے کی کوشش میں ہمیں مسئلے کو مزید پیچیدہ نہیں کرنا چاہیے۔
یہ ضروری ہے کہ ہم بین الاقوامی قانون کی بنیادوں پر قائم رہیں اور کسی بھی قسم کی نسلی صفائی سے گریز کریں۔انتونیو گوٹیرس نے دو ریاستی حل پر زور دیتے ہوئے کہا کہ ہمیں دو ریاستی حل کو دوبارہ تسلیم کرنا چاہیے۔اگرچہ گوٹیرس نے اپنے خطاب میں ٹرمپ یا غزہ کے حوالے سے ان کی تجویز کا ذکر نہیں کیا لیکن اقوام متحدہ کے ترجمان سٹیفن ڈوجارک نے صحافیوں کو بتایا کہ اسے سیکرٹری جنرل کا ردعمل سمجھا جا سکتا ہے۔قبل ازیں گوتریس نے اردن کے شاہ عبداللہ سے بھی خطے کی صورتحال پر تبادلہ خیال کیا جس کے بعد اقوام متحدہ میں فلسطین کے سفیر ریاض منصور نے کمیٹی کو بتایا کہ شاہ عبداللہ اگلے ہفتے واشنگٹن میں ٹرمپ کو عرب ریاستوں کی جانب سے ایک مربوط پیغام دیں گے۔سفیر ریاض منصور نے کمیٹی کو بتایا کہ فلسطین کے علاوہ ہمارا کوئی ملک نہیں ہے۔ غزہ اس کا قیمتی حصہ ہے۔ ہم غزہ نہیں چھوڑیں گے۔انہوں نے مزید کہا کہ دنیا کی کوئی طاقت فلسطینیوں کو ہمارے آباؤ اجداد کی سرزمین بشمول غزہ سے بے دخل نہیں کرسکتی۔
