اردو ورلڈ کینیڈا ( ویب نیوز)کینیڈا کے وزیر اعظم جسٹن ٹروڈو نے کہا ہے کہ ان کے حکم پر ایک امریکی جنگی طیارے نے شمالی کینیڈا میں آسمان پر پرواز کرنے والی ایک نامعلوم چیز کو مار گرایا ہے۔

جسٹن ٹروڈو نے اپنی ٹویٹ میں لکھا کہ امریکی اور کینیڈین افواج کے مشترکہ آپریشن میں امریکی F-22 لڑاکا طیارے نے شمالی کینیڈا کے علاقے یوکون کے اوپر پرواز کرنے والی ایک نامعلوم چیز کو مار گرایا۔
جسٹن ٹروڈو کے ٹویٹ سے پہلے نارتھ امریکن ایئر ڈیفنس کمانڈ (NORAD) نے کہا تھا کہ کینیڈا کی فضائی حدود میں ایک نامعلوم چیز کو پرواز کرتے ہوئے دیکھا گیا ہے۔
ایک اور ٹوئٹ میں جسٹن ٹروڈو نے لکھا کہ ان کی امریکی صدر سے بات ہوئی ہے اور اب کینیڈین فورسز اس چیز کے ملبے کو جمع کرنے کے بعد اس کا تجزیہ کریں گی۔
واضح رہے کہ گزشتہ روز امریکا نے بھی الاسکا کے اوپر سے پرواز کرنے والی ایک نامعلوم چیز کو مار گرانے کا دعویٰ کیا تھا جب کہ اس سے قبل امریکا نے ایک مشتبہ چینی جاسوس غبارے کو مار گرایا تھا۔