Imran 
اردو ورلڈ کینیڈا ( ویب نیوز ) آئی ایم ایف کی کی جانب سے پاکستان کے لیے 7 ارب ڈالر کے بیل آؤٹ پیکج کی منظوری مزید موخر کردی گئی۔ذرائع کے مطابق آئی ایم ایف کے ایگزیکٹو بورڈ کے شیڈول میں پاکستان کا نام شامل نہیں کیا گیا اور ایگزیکٹو بورڈ 28 سے 30 اگست تک ویتنام سمیت 3 دیگر ممالک کی درخواستوں پر غور کرے گا۔ ذرائع کا کہنا ہے کہ پاکستان کے لیے قرضے کے نئے پروگرام کی منظوری اگلے ماہ تک موخر کر دی گئی ہے جب کہ دوست ممالک کی جانب سے 12 ارب ڈالر کے قرضوں کا بروقت رول اوور نہ ہونے کو تاخیر کی بڑی وجہ قرار دیا گیا ہے۔
ذرائع کا کہنا ہے کہ آئی ایم ایف نے بورڈ اجلاس سے قبل بیرونی فنانسنگ کی یقین دہانی کی شرط رکھی ہے، پاکستان کے پاس سعودی عرب سے 5 ارب ڈالر، چین سے 4 ارب ڈالر اور متحدہ عرب امارات سے 3 ارب ڈالر کے ذخائر موجود ہیں۔ذرائع کے مطابق حکومت 3 ممالک کے 12 ارب ڈالر کے ذخائر کو رول اوور کرنے اور تجارتی قرضوں کی ری فنانسنگ کی کوشش کر رہی ہے جب کہ پاکستان کو رواں مالی سال تجارتی قرضوں سمیت مجموعی طور پر 26 ارب 40 ارب ڈالر کی بیرونی ادائیگیاں کرنی ہیں۔
