اردو ورلڈ کینیڈا (ویب نیوز)بھارتی کرکٹ ٹیم کے کپتان روہت شرما کپتانوں کے ایونٹ میں شرکت کے لیے پاکستان آئیں گے یا نہیں اس کا فیصلہ ابھی نہیں ہوا۔
روہت شرما کے دورہ پاکستان کے بارے میں کوئی وضاحت نہیں کی گئی ہے۔ کپتانوں کے ایونٹ کے لیے ان کی روانگی تاحال غیر واضح ہے جب کہ چیمپئنز ٹرافی کے کپتانوں کا ایونٹ 16 یا 17 فروری کو کراچی میں ہونے کا امکان ہے۔اس حوالے سے بھارتی کرکٹ بورڈ کے سیکرٹری دیوجیت سائکیا کا کہنا ہے کہ روہت شرما کے دورہ پاکستان کے حوالے سے کوئی بات نہیں ہوئی، یہ معاملہ ابھی ایجنڈے میں نہیں ہے۔اس بات کی تصدیق نہیں ہو سکی ہے کہ بھارتی بورڈ کو روہت شرما کے لیے حکومتی اجازت درکار ہے۔
پی سی بی پہلے ہی آئی سی سی پر زور دے چکا ہے کہ سب کچھ پالیسیوں اور روایت کے مطابق ہونا چاہیے۔اس کے علاوہ بھارتی کرکٹ ٹیم کی شرٹ پر پاکستان کا نام لکھنے کا معاملہ پہلے ہی حل ہو چکا ہے اور بھارتی سیکرٹری نے کہا ہے کہ آئی سی سی کے قوانین پر عمل کیا جائے گا۔واضح رہے کہ آئی سی سی ٹی ٹوئنٹی ورلڈ کپ 2024 سے قبل کپتانوں کی کوئی پریس کانفرنس نہیں ہوئی، ایونٹ میں شریک ٹیمیں ویسٹ انڈیز اور امریکا کے شہروں میں وارم اپ میچز میں مصروف تھیں۔
