اردو ورلڈ کینیڈا ( ویب نیوز ) پاکستان کرکٹ ٹیم کی آئی سی سی ٹی ٹوئنٹی ورلڈ کپ میں شرکت تاحال غیر یقینی صورتحال کا شکار ہے

جبکہ اس حوالے سے آج ایک نہایت اہم پیش رفت متوقع ہے۔ ذرائع کے مطابق چیئرمین پاکستان کرکٹ بورڈ (پی سی بی) محسن نقوی آج وزیراعظم شہباز شریف سے ملاقات کریں گے، جس میں ورلڈ کپ میں پاکستان کی شرکت یا عدم شرکت پر مشاورت کی جائے گی۔اگرچہ پاکستان کرکٹ ٹیم کے اسکواڈ کا اعلان ہوچکا ہے، تاہم بنگلادیش کرکٹ بورڈ کو بھارت میں کھیلنے سے انکار پر آئی سی سی کی جانب سے ایونٹ سے باہر کیے جانے کے بعد پاکستان کی شرکت پر بھی سوالیہ نشان لگ گیا ہے۔ ذرائع کا کہنا ہے کہ اس ملاقات میں نہ صرف سکیورٹی صورتحال بلکہ آئی سی سی کے فیصلوں اور ممکنہ سفارتی اثرات پر بھی تفصیلی غور کیا جائے گا۔
ذرائع کے مطابق حکومت نے ٹی ٹوئنٹی ورلڈ کپ میں شرکت سے متعلق فیصلہ کرنے سے قبل وزیر خارجہ اسحاق ڈار سے بھی مشاورت کا فیصلہ کیا ہے تاکہ خارجہ پالیسی اور علاقائی صورتحال کو مدنظر رکھتے ہوئے کوئی حتمی فیصلہ کیا جا سکے۔وفاقی وزیر اطلاعات عطا اللہ تارڑ نے اس معاملے پر گفتگو کرتے ہوئے کہا ہے کہ حکومت اس معاملے پر مشاورت کر رہی ہے اور قومی مفاد کو سامنے رکھ کر کردار ادا کرے گی۔ ان کا کہنا تھا کہ جو بھی فیصلہ ہوگا، قوم کو بروقت آگاہ کیا جائے گا۔
دوسری جانب چیئرمین پی سی بی محسن نقوی نے آئی سی سی کے فیصلے پر سخت ردعمل دیتے ہوئے کہا ہے کہ بنگلادیش کرکٹ بورڈ کا مؤقف اصولوں پر مبنی تھا اور آئی سی سی کا دوہرا معیار کسی صورت قابل قبول نہیں۔ انہوں نے کہا کہ سیاست زدہ کرکٹ کسی کے مفاد میں نہیں اور تمام فریقین کو کرکٹ کے طے شدہ اصولوں کے مطابق فیصلے کرنے چاہئیں۔محسن نقوی کا مزید کہنا تھا کہ پاکستانی کھلاڑی باصلاحیت ہیں اور کسی بھی میدان میں مقابلہ کرنے کی بھرپور صلاحیت رکھتے ہیں، تاہم کامیابی ہمیشہ ٹیم ورک اور منصفانہ فیصلوں سے ہی حاصل ہوتی ہے۔ انہوں نے واضح کیا کہ ٹی ٹوئنٹی ورلڈ کپ میں شرکت کا حتمی فیصلہ حکومت پاکستان کرے گی کیونکہ پی سی بی حکومت کے دائرہ اختیار میں کام کرتا ہے۔یاد رہے کہ چند روز قبل بنگلادیش کرکٹ بورڈ نے سکیورٹی خدشات کی بنیاد پر بھارت میں ٹی ٹوئنٹی ورلڈ کپ کے میچز کھیلنے سے انکار کر دیا تھا اور مطالبہ کیا تھا کہ اس کے میچز سری لنکا منتقل کیے جائیں۔ تاہم آئی سی سی نے یہ مطالبہ مسترد کرتے ہوئے بنگلادیش کو ایونٹ سے باہر کر دیا اور اس کی جگہ اسکاٹ لینڈ کو شامل کر لیا۔
ذرائع کے مطابق بنگلادیش کے اس فیصلے کے بعد یہ اطلاعات بھی سامنے آئیں کہ اگر پاکستان بھی ایونٹ میں شرکت سے انکار کرتا ہے تو وہ بھی بائیکاٹ کی راہ اختیار کر سکتا ہے۔واضح رہے کہ آئی سی سی ٹی ٹوئنٹی ورلڈ کپ کا آغاز 7 فروری سے ہو رہا ہے جبکہ پاکستان کے میچز سری لنکا میں شیڈول کیے گئے ہیں، تاہم موجودہ صورتحال میں پاکستان کی شرکت کا حتمی فیصلہ آج ہونے والی اعلیٰ سطحی مشاورت کے بعد متوقع ہے۔