پاکستان تحریک انصاف کے سوشل میڈیا پیج پر سینیٹر اعظم خان سواتی کی ویڈیو جاری کر دی گئی ہے جس میں اعظم سواتی مانسہرہ سے قومی اسمبلی کے حلقہ انتخاب میں نواز شریف کے خلاف الیکشن لڑنے کی خواہش کا اظہار کر رہے ہیں.
پی ٹی آئی کے رہنما نے سابق وزیر اعظم پر بدعنوانی اور ملک کی دولت لوٹ کر بیرون ملک جائیدادیں بنانے کا الزام لگایا, انہوں نے کہا کہ نواز شریف نے این اے 15 مانسہرہ سے قومی اسمبلی کا الیکشن لڑنے کے لیے اپنے کاغذات نامزدگی جمع کرائے ہیں.
اعظم سواتی نے کہا کہ اگر میری پارٹی مجھے ٹکٹ دے تو میں نواز شریف سے مقابلہ کروں گا اورمانسہرہ کی بہنیں اور بھائی 8 فروری کو مجھے اور تحریک انصاف کو ووٹ دیکر اپنا پیغام دیں گے.
یاد رہے کہ مانسہرہ سے نواز شریف کے کاغذات نامزدگی موصول ہوئے تھے اور انہوں نے کہا تھا کہ نواز شریف قومی اسمبلی کا انتخاب جیتنے کے بعد چوتھی بار ملک کے وزیر اعظم بنیں گے
دوسری جانب سینیٹر اعظم سواتی سمیت پی ٹی آئی کے 18 رہنماؤں کے شناختی کارڈ, مراد سعید اور حماد اظہر کو 9 مئی کے واقعات میں ملوث ہونے اور عدالتوں کا سامنا نہ کرنے کی وجہ سے بلاک کر دیا گیا ہے.