اردوورلڈ کینیڈا( ویب نیوز )پاکستان تحریک انصاف کے رہنما اور سابق رکن قومی اسمبلی علی محمد خان نے کہا ہے کہ پرویز خٹک عزت کے دائرے میں رہ کر سیاست کریں۔
نجی ٹی وی کے پروگرام میں خصوصی گفتگو کرتے ہوئے علی محمد خان نے پرویز خٹک سے متعلق سوال پر کہا کہ پرویز خٹک کون ہیں؟ جس شخص کو چیئرمین پی ٹی آئی نے وزیر اعلیٰ اور پھر وزیر دفاع بنایا؟
انہوں نے کہا کہ پی ٹی آئی کا حصہ بننے سے پہلے پرویز خٹک کو کوئی نہیں جانتا تھا۔
شاہ محمود قریشی کی حالیہ گرفتاری کے حوالے سے ان کا کہنا تھا کہ شاہ محمود قریشی عدالتوں میں پیش ہورہے ہیں، ان کی گرفتاری کی کیا ضرورت تھی، ان کی گرفتاری سے کشیدہ سیاسی صورتحال میں مزید اضافہ ہوگا۔
انتخابات کے حوالے سے علی محمد خان کا کہنا تھا کہ آئین میں بالکل واضح ہے کہ اگر اسمبلی تحلیل ہوتی ہے تو 90 دن کے اندر انتخابات کرائے جائیں آئین سپریم ہے اور ملک آئین کے مطابق چلتا ہے۔
پی ٹی آئی رہنما نے کہا کہ آئین کے مطابق انتخابات کی تاریخ صدر 90 دن میں دیں گے۔
پی ٹی آئی کی مقبولیت پر ان کا کہنا تھا کہ شفاف اور غیر جانبدارانہ انتخابات سے پتہ چلے گا کہ کون مقبول ہے، یہ عوامی مقابلہ ہے، جو جیتے گا اسے اقتدار ملے گا انتخابات وقت پر ہونے چاہئیں اور سب اپنا اپنا کام کریں۔
علی محمد خان نے مزید کہا کہ چیئرمین پی ٹی آئی گرفتار ہیں لیکن کور کمیٹی ان کی ہدایت پر کام کر رہی ہے، امید ہے چیئرمین پی ٹی آئی بہت جلد سامنے آئیں گے اور پھر پارٹی کی قیادت کریں گے۔
