اردو ورلڈ کینیڈا ( ویب نیوز )پاکستان کے وزیر اعظم میاں محمد شہباز شریف نے قطری شہزادی شیخہ اسماء آل ثانی کو پاکستان کے پہاڑوں اور سیاحت کی برانڈ ایمبیسڈر مقرر کرنے کا اعلان کیا ہے۔ اس کا مقصد پاکستان کے قدرتی حسن، بالخصوص شمالی علاقہ جات اور بلند و بالا پہاڑوں کو دنیا بھر میں اجاگر کرنا ہے۔وزیر اعظم نے یہ اعلان ایک سوشل میڈیا پلیٹ فارم "ایکس” (سابقہ ٹوئٹر) پر جاری اپنے ایک پیغام میں کیا۔ شہباز شریف نے کہا کہ انہیں یہ اعلان کرتے ہوئے خوشی ہو رہی ہے کہ شیخہ اسماء آل ثانی کو پاکستان کی سیاحت اور پہاڑوں کی نمائندہ مقرر کیا گیا ہے۔

شیخہ اسماء آل ثانی نے حال ہی میں نانگا پربت سر کر کے ایک نئی تاریخ رقم کی ہے۔ وہ اس چوٹی پر قطر کا پرچم لہرانے والی پہلی قطری خاتون  بن گئی ہیں۔ ان کا یہ نواں موقع تھا جب انہوں نے 8000 میٹر سے بلند کسی پہاڑ کو سر کیا۔ اپنے ایک سوشل میڈیا پیغام میں انہوں نے لکھا کہ نانگا پربت ایک انتہائی مشکل اور خطرناک مہم تھی جو ان کے لیے جسمانی اور ذہنی طور پر چیلنجنگ ثابت ہوئی۔انہوں نے کہا:  "یہ پہاڑ میرے لیے ایک ایسا امتحان تھا جس کی میں نے توقع نہیں کی تھی۔ میرے قدموں تلے برف اور ہر لمحے گرتے پتھر مجھے یاد دلاتے رہے کہ زندگی کتنی نازک ہے۔ لیکن اس خطرے میں بھی ایک نئی طاقت، عاجزی اور خود کو پہچاننے کا موقع ملا۔”

شیخہ اسماء آل ثانی نے اپنی مہم کے دوران فلسطینی عوام سے بھی اظہارِ یکجہتی کیا۔ انہوں نے اپنی مہم کے دوران فلسطینی پرچم اپنے لباس پر آویزاں رکھا۔ نانگا پربت کی چوٹی سر کرنے کے بعد ایک اور پوسٹ میں انہوں نے معروف فلسطینی شاعر محمود درویش کے اشعار شیئر کرتے ہوئے لکھا:  "یہ ان لوگوں کے لیے ہے جو آج بھی ثابت قدم ہیں، ان جانوں کے لیے جو چلی گئیں، ان آوازوں کے لیے جو خاموش کر دی گئیں، اور اس خوف کے لیے جو آنے والے کل سے جڑا ہے۔

 خدا کرے کہ آزادی اپنا راستہ پا لے اور انصاف مزید تاخیر کا شکار نہ ہو "

وزیرِاعظم نے قطری شہزادی کو نانگا پربت  جیسی بلند اور مشکل چوٹی سر کرنے پر بھی مبارکباد پیش کی۔ نانگا پربت دنیا کی نویں اور پاکستان کی دوسری بلند ترین چوٹی ہے جس کی بلندی  8126 میٹر  ہے۔ وزیرِاعظم نے اس کارنامے کو "قابلِ تقلید اور متاثر کن قرار دیا۔ان کا کہنا تھا کہ یہ کامیابی نہ صرف  حوصلے، استقامت اور عزم کی علامت ہے بلکہ یہ پاکستان اور قطر کے درمیان قائم دوستانہ تعلقات کی بھی مضبوط عکاسی کرتی ہے۔

وزیرِاعظم شہباز شریف کی جانب سے شیخہ اسماء کو پاکستان کی سیاحت کی سفیر مقرر کرنا نہ صرف ایک مثبت سفارتی قدم ہے بلکہ یہ پاکستان کے خوبصورت شمالی علاقہ جات کو عالمی سطح پر روشناس کروانے کی ایک سنجیدہ کوشش ہے۔ اس اقدام سے پاکستان کی سیاحت، خاص طور پر مہم جوئی، کوہ پیمائی اور پہاڑی سیاحت کو نئی بلندی ملنے کی امید کی جا رہی ہے۔