اردو ورلڈ کینیڈا ( ویب نیوز ) کینیڈا کے سب سے بڑے شہر میں آئندہ میئر کی دوڑ کے حوالے سے
سامنے آنے والے ایک نئے سروے میں موجودہ میئر اولیویا چاو کو اپنے ممکنہ حریفوں پر واضح برتری حاصل ہوتی دکھائی دے رہی ہے۔سیاسی مشاورتی ادارے کی جانب سے جاری کردہ سروے کے مطابق اولیویا چاو کو 44 فیصد عوامی حمایت حاصل ہے۔ سروے میں بریڈ بارڈ فورڈ کو 26 فیصد جبکہ ممکنہ امیدوار Michael Ford کو 16 فیصد حمایت ملی۔
یہ سروے ایسے وقت میں سامنے آیا ہے جب ٹورنٹو کے سابق میئر John Tory پہلے ہی اعلان کر چکے ہیں کہ وہ آئندہ میئر کے انتخاب میں حصہ نہیں لیں گے۔ ان کے اس فیصلے کے بعد شہر کی سیاسی فضا میں نئی سرگرمی دیکھنے میں آ رہی ہے اور مختلف امیدوار اپنی پوزیشن مضبوط کرنے کی کوشش کر رہے ہیں۔ تاہم موجودہ صورتحال میں اولیویا چاو کو واضح برتری حاصل ہوتی دکھائی دے رہی ہے۔
سروے کے مطابق میئر چاو کی کارکردگی کے حوالے سے عوامی رائے بھی مثبت ہے۔ ان کی منظوری کی درجہ بندی میں تقریباً تین فیصد اضافہ ریکارڈ کیا گیا ہے۔ اس کے علاوہ تقریباً نصف شہریوں کا خیال ہے کہ Toronto درست سمت میں آگے بڑھ رہا ہے۔
سروے 6 سے 8 مارچ 2026 کے درمیان کیا گیا جس میں ایک ہزار افراد کی رائے حاصل کی گئی۔ اس عمل میں انٹرایکٹو وائس ریکارڈنگ ٹیکنالوجی استعمال کی گئی اور شہریوں سے لینڈ لائن اور موبائل فون دونوں کے ذریعے رابطہ کیا گیا۔
کمپنی کے پرنسپل David Valentin کے مطابق موجودہ اعداد و شمار اس بات کی نشاندہی کرتے ہیں کہ اس وقت سیاسی ماحول میئر اولیویا چاو کے حق میں نظر آ رہا ہے۔ ان کے بقول نہ صرف انتخابی دوڑ میں بلکہ عوامی تاثر اور شہر کی سمت کے حوالے سے بھی کئی اشاریے چاو کے لیے مثبت ہیں۔سیاسی مبصرین کا کہنا ہے کہ اگر یہی رجحان برقرار رہا تو آئندہ میئر کے انتخاب میں اولیویا چاو مضبوط پوزیشن کے ساتھ میدان میں اتریں گی۔ تاہم انتخابی مہم کے آغاز کے ساتھ سیاسی منظرنامے میں مزید تبدیلیاں بھی سامنے آ سکتی ہیں۔
