اردو ورلڈ کینیڈا ( ویب نیوز )انگلینڈ کے مایہ ناز بیٹر بین ڈکٹ نے انڈین پریمیئر لیگ 2026 سے دستبرداری کا اعلان کر دیا ہے

جس کی بنیادی وجہ انہوں نے اپنے بین الاقوامی کیریئر پر مکمل توجہ دینا قرار دی ہے۔اپنے بیان میں بین ڈکٹ نے کہا کہ انہوں نے یہ فیصلہ طویل غور و فکر کے بعد کیا ہے اور اس کا مقصد انگلینڈ کی نمائندگی کو ترجیح دینا اور اپنی فارم کو بہتر بنانا ہے۔ ان کے مطابق یہ ایک مشکل فیصلہ تھا، تاہم موجودہ حالات میں یہی ان کے کیریئر کے لیے بہترین راستہ ہے۔
انہوں نے دہلی کیپیٹلز کی انتظامیہ اور ٹیم ساتھیوں سے معذرت کرتے ہوئے کہا کہ وہ اس سیزن میں ٹیم کو دستیاب نہیں ہوں گے۔ ان کا کہنا تھا کہ وہ ٹیم کا حصہ بننے کے موقع کو قدر کی نگاہ سے دیکھتے ہیں لیکن قومی ذمہ داریاں ان کے لیے اولین ترجیح ہیں۔31 سالہ کرکٹر نے اس بات کا بھی اعتراف کیا کہ عمر کے اس مرحلے پر ممکن ہے کہ انہیں مستقبل میں دوبارہ آئی پی ایل کھیلنے کا موقع نہ ملے، تاہم وہ اپنی بین الاقوامی کارکردگی کو بہتر بنا کر اس امکان کو زندہ رکھنا چاہتے ہیں۔
اسپورٹس رپورٹس کے مطابق بین ڈکٹ نے اپنی فارم بحال کرنے اور انگلینڈ کرکٹ ٹیم میں مستقل جگہ برقرار رکھنے کے لیے یہ قدم اٹھایا ہے۔ یاد رہے کہ انہیں پہلی بار آئی پی ایل میں کسی فرنچائز نے منتخب کیا تھا۔دسمبر میں ہونے والی نیلامی میں دہلی کیپیٹلز نے بین ڈکٹ کو تقریباً 2 کروڑ بھارتی روپے میں خریدا تھا، تاہم اب معاہدے سے دستبرداری کے باعث وہ آئندہ چند برسوں تک لیگ میں شرکت نہیں کر سکیں گے۔کرکٹ ماہرین کے مطابق یہ فیصلہ ظاہر کرتا ہے کہ بین ڈکٹ اپنے بین الاقوامی کیریئر کو سنجیدگی سے لے رہے ہیں اور وہ اپنی کارکردگی میں تسلسل لانے کے لیے فرنچائز کرکٹ کے بجائے قومی ذمہ داریوں کو ترجیح دے رہے ہیں۔