اردو ورلڈ کینیڈا ( ویب نیوز )پاکستان میں پیٹرول کی قیمتوں پر پندرہ دن بعد نظرثانی کی جاتی ہےتاہم اس بار قیمتیں ابھی تک تبدیل نہیں کی گئی ہیں کیونکہ وزیراعظم شہباز شریف نے ابھی تک اپنی ہدایات نہیں دی ہیں، ذرائع نے بتایا کہ وزیر اعظم جو اس وقت سمرقند، ازبکستان میں ہیں – کے پاس پیٹرولیم مصنوعات کی قیمتوں میں تبدیلی کی منظوری کا اختیار ہے۔
لیکن وزیر اعظم شہباز شنگھائی تعاون تنظیم (SCO) کے سربراہان مملکت (CHS) سربراہی اجلاس میں شرکت کر رہے ہیں، جہاں انہوں نے روس کے صدر ولادیمیر پوتن، ترکی کے رجب طیب اردگان اور دیگر سے بھی ملاقاتیں کیں ۔
ذرائع نے بتایا کہ "وزارت خزانہ وزیر اعظم کی ہدایات کا انتظار کر رہی ہے، ایک بار جب وزیر اعظم انہیں بھیجی گئی سمری پر فیصلہ کر لیں گے، تب ہی نئی قیمتیں جاری کی جائیں گی”۔
ذرائع کے مطابق اگلے پندرہ دن تک پیٹرول کی قیمت 9.62 روپے فی لیٹر کی کمی کے بعد 235.98 روپے فی لیٹر سے کم ہو کر 226.36 روپے پر آنے کا امکان ہے۔
تاہم، ڈیزل کی قیمت میں 3.04 روپے فی لیٹر کا معمولی اضافہ متوقع ہے، جو مذکورہ مدت کے لیے 247.26 روپے فی لیٹر سے بڑھ کر 250.30 روپے تک پہنچ جائے گا۔
